Sýslumaður

Varðveitt hjá

Úr aðfangabók: Brjóstmynd, olíumáluð á striga, í mjórri, strikheflaðri og rauðmálaðri umgjörð. Mynd þessi er úr kirkjunni á Eyri við Seyðisfjörð í Ísafjarðarsýslu og er óefað það „Portrait Magnúsar Magnússonar sýslumanns“, sem nefnt er í visitasíu Hannesar biskups Finnssonar 6. ág. 1790. Magnús er fæddur 1631 og dáinn 1704. Myndin er af honum öldruðum og er vafalaust eftir Hjalta prófast Þorsteinsson í Vatnsfirði. Úr Mynd á þili: (Texti eftir Þóru Kristjánsdóttur) Nokkur málverk eru eignuð séra Hjalta Þorsteinssyni. Þau eru varðveitt í Þjóðminjasafninu. „Þrjú verk a.m.k. eru sögð máluð eftir að hann settist að í Vatnsfirði, myndir af sýslumönnunum á Eyri og í Ögri, þeim Magnúsi Magnússyni og Markúsi Bergssyni, og einnig málverk af Steini Jónssyni Hólabiskupi, öll máluð á gróft hörléreft. Málverkin af sýslumönnunum eru ekki ólík að ytri gerð. Andlitin eru máluð aðeins á hlið og nefið teiknað skýrum dráttum. Það er dæmigert fyrir mannamyndir séra Hjalta. Á báðum málverkunum eru gráir stallar líkir þeim sem eru t.d. á predikunarstólnum í Hraunskirkju í Keldudal, þar standa Kristur og postularnir á sams konar stöllum. Og á báðum málverkunum eru rauð klæði í bakgrunninum, líkt og einnig er að finna á myndunum af biskupshjónunum í Skálholti, Þórði Þorlákssyni og Guðríði, svo og á minningartöflunni í Bæjarkirkju á Rauðasandi af Guðrúnu Eggertsdóttur og Birni Gíslasyni. Málverkin bera þess þó bæði merki að hafa verið endurmáluð oftar en einu sinni. Hjalti hefur málað myndina af Magnúsi um aldamótin 1700 og virðist hafa lagt höfuðáherslu á að sýna hinn aldna fræðimann á Eyri með sitt gráa, úfna hár.“ (Sett inn af Sigrúnu Blöndal, 12.10.2010)