Bæringsstofa

Bæring Cecilsson fæddist 1923 á Búðum undir Kirkjufelli í Grundarfirði. Bæring var virkur ljósmyndari alla sína tíð og var fréttaritari fyrir Ríkissjónvarpið um árabil. Hann var útnefndur heiðursborgari Grundarfjarðar 1997 og lést 2002, 79 ára. Talið er að hann hafi skilið eftir sig yfir sjötíu þúsund ljósmyndir og filmur og heilmikið af kvikmyndafilmum sem hafa verið færðar á rafrænt form. Ljósmyndir Bærings Cecilssonar spanna tímann frá myndun þéttbýlis í Grundarfirði (sem hét þá Grafarnes) eftir 1938 og fram undir árið 2000. Myndirnar lýsa því hvernig þorpið óx og mannlífið þróaðist. Um tvö þúsund slides myndir og um níu þúsund ljósmynda voru skannaðar á árunum 2003-2006 af áhugasömum heimamönnum. Á sama tíma var byggt upp safn og sýningarsalurinn Bæringsstofa í Sögumiðstöðinni í Grundarfirði á vegum félagsins Eyrbyggju Sögumiðstöðvar. Jafnframt skönnun ljósmynda Bærings var boðið upp á að skanna fjölskyldualbúm íbúa sveitarfélagsins og hafa þær myndir ásamt ljósmyndum Bærings verið notaðar til sýninga á mannamótum í Bæringsstofu. Eftir lát Bærings afhentu ættingjar hans Grundarfjarðarbæ myndasafn hans til varðveislu og voru kvikmyndafilmurnar færðar á rafrænt form árið 2014 en áður höfðu þær verið yfirfærðar á Betaspólur. Kvikmyndafilmurnar eru varðveittar í Kvikmyndasafni Íslands. Átak í skönnun filmusafnsins á tiff form hófst árið 2021 og hafa nú (2022) verið skannaðir um 21.000 filmurammar af yfir 40 þúsundum. Um 9.000 áður skannaðar ljósmyndir á pdf og í lítilli upplausn, auk þeirra 21.000 sem eru aðeins á pappírsformi, verða skannaðar á tiff form. Bókasafn Grundarfjarðar sér um varðveislu og skráningu safnsins fyrir Grundarfjarðarbæ.