Safnasafnið - Alþýðulist Íslands

Safnsafnið á Svalbarðseyri er einstakt listasafn sem leggur sérstaka áherslu á jaðarlist (outsider art), óslípaða list (art brut) og alþýðulist -  en lítur einnig til lærðra listamanna sem fara sínar eigin leiðir í listsköpun. Safnið var stofnað árið 1995 af Níelsi Hafstein og Magnhildi Sigurðardóttur sem á þremur áratugum hefur tekist það sem ólíklegt þótti - að færa alþýðulistina af jaðrinum inn að miðju. Safnið er ekki aðeins menningar- og varðveislustofnun heldur lifandi vettvangur nýrrar hugsunar um gildi og hlutverk listar í samtímanum.  Hlutverk og markmið safnsins er að safna, varðveita, miðla, skrá og rannsaka list eftir listafólk sem stundum er kallað næft (naive) eða einfarar í myndlist. Verk listafólksins er metið á eigin forsendum, án tillit til félagslegrar stöðu, menntunar eða frægðar, og þannig skakapst rými fyrir raddir og sjónarhorn sem annars gætu gleymst eða orðið útundan í hefðbundinni listsöfnun. Safnið leggur mikla áherslu á að öll verk í safneign, og á sýningum, njóti jafnræðis - og hefur frá upphafi unnið markvisst með inngildingu og fjölbreytileika í öllum sínum stefnum. Safnasafnið er staðsett á Svalbarðseyri við Eyjafjörð. Sýningaraðstaðan samanstendur af gamla barnaskólanum, sem jafnframt var þinghús Svalbarðsstrandarhrepps, og kaupfélaginu Gömlu-Búð sem reist var árið 1900 á Svalbarðseyri en flutt á safnlóðina 2006 og endurgert. Þessi tvö virðulegu hús voru síðan tengd saman með glæsilegri viðbyggingu og safnið opnað í núverandi mynd árið 2007 með 10 misstórum sýningarsölum í um 500 fermetra sýningarrými.