Sagnheimar

Sagnheimar, byggða- og náttúrugripasafn byggir á gömlum merg byggðasafns Vestmannaeyja. Frumkvöðull byggðasafnsins Þorsteinn Þ. Víglundsson miðaði stofnun safnsins ávallt við þann atburð er hann fékk fyrsta safngripinn í hendur vorið 1932 og er safnið því eitt af elstu byggðasöfnum landsins.  Saga byggðasafnsins frá stofnun allt fram til 1978 má kalla samofin ævi Þorsteins Þ. Víglundssonar (1899-1984) frumkvöðuls og aðaldriffjöður safnsins sem í tæpa hálfa öld barðist fyrir stofnun og tilveru safnsins. Varðveisla menningarverðmæta var Þorsteini ávallt ofarlega í huga og hafði hann einstakt lag á að vekja áhuga nemenda sinna og virkja þá til að aðstoða sig við að safna ýmsum munum og bjarga þeim þannig frá glötun. Safnhugmyndir sínar sótti hann til norskra byggðasafna sem hann kynntist á námsárum sínum þar (1921-1923). Munir byggðasafnsins voru lengi á hrakhólum með húsnæði, fékk m.a. inni í Gagnfræðaskóla Vestmannaeyja og Sparisjóðnum og hlaut skjól í Þjóðminjasafninu á tímum Heimaeyjargoss. Árið 1978 var stórum áfanga náð er byggðasafnið flutti í nýbyggt Safnahús ásamt bókasafni, héraðsskjalasafni, ljósmyndasafni og listasafni Vestmannaeyja. Ýmsar breytingar hafa verið gerðar á safninu og uppsetningu sýninga frá því að safnið kom í Safnahúsið. Stærstar og mestar eru þó að líkindum breytingarnar sem gerðar voru veturinn 2010-2011 en opnað var alveg gjörbreytt safn 2. júlí 2011 undir nafninu Sagnheimar, byggðasafn. Safnið byggir mikið á margmiðlun og texta en munum í sýningu hefur verið fækkað verulega. Nær helmingur sýningarsvæðis er bryggjusvæði þar sem fjallað er um sjómennsku og fiskvinnslu ásamt beituskúr og verbúð. Einnig er þar úteyjarkofi þar sem bjargnytjum eru gerð skil. Af öðrum föstum sýningum má nefna , Þjóðhátíð, Tyrkjarán, íslenska mormóna í Utah, líf kvenna, Kaptein Kohl og Herfylkingu Vestmannaeyja og Heimaeyjargosið. Á sýningarsvæðinu eru örsýningar þar sem munir úr geymslu safnsins eru dregnir fram. Á safninu er góð aðstaða fyrir kvikmyndasýningar og fyrirlestra fyrir allt að 130 manns ásamt góðum sal fyrir listasýningar. Fyrir börn er sjóræningjahellir með búningum og fjársjóðskistu, snertisafn og torbær til leikja. Markmið safnsins er að höfða til allra aldurshópa með fræðslu og skemmtun.