Listasafn Reykjanesbæjar

Listasafn Reykjanesbæjar hóf skipulega safnastarfsemi árið 2003, en hafði verið til sem hugmynd frá sameiningu sveitarfélaganna Njarðvíkur, Hafnarhrepps og Keflavíkur árið 1994. Á þeim tíma var þó ekki um eiginlegt listasafn að ræða, heldur listaverkaeign Reykjanesbæjar sem varð til við sameiningu sveitarfélaganna og samanstóð af um 200 verkum. Áður hafði Listasafn Keflavíkur verið til sem nafn yfir sjálfstæða nefnd sem ásamt bæjarritara sá um innkaup listaverka. Eftir langan aðdraganda kom að því að stofnskrá var samþykkt af menningar- og safnaráði Reykjanesbæjar þann 8. október 2002 og í framhaldi fékk listasafnið sjálfstæðan fjárhag, húsnæði og samþykktar sýningar- og söfnunarstefnur. Listasafn Reykjanesbæjar er í Duus Safnahúsum og er formleg stofnun safnsins miðuð við fyrstu sýninguna sem opnuð var þann 17. apríl 2003 í nýrri viðbyggingu, 300 fermetra sýningarsal, en áður höfðu tvær sýningar verið settar upp haustið 2002, í salnum ókláruðum. Árið 2020 bættist annar sýningarsalur við og hefur listasafnið nú um 700 fermetra til sýningarhalds. Í fremri sal og gluggasal eru haldnar samanlagt um 5 sýningar allt árið um kring. Safnkosturinn er varðveittur í nýrri safnamiðstöð á Ásbrú, Sögu, og eru verk úr safneign til sýnis víðs vegar í stofnunum Reykjanesbæjar. Listasafn Reykjanesbæjar er eina listasafnið á Suðurnesjum og skipar því stórt hlutverk í menningarlífi svæðisins. Það starfar af eldmóð, í þágu fjölbreytileika, framsækni og inngildingar. Megin hlutverk listasafnsins er að standa fyrir metnaðarfullri sýningardagskrá sem nær til breiðs hóps gesta, að efla safneign og rannsóknir, styrkja tengsl við innlent og alþjóðlegt listalíf, vera í virkum samskiptum við samfélagið og styðja við listsköpun á Suðurnesjum. Áherslumál til framtíðar eru að efla aðgengi, styrkja fjölbreytt fræðslustarf og stuðla að sjálfbærri þróun safnsins. Listasafn Reykjanesbæjar leggur áherslu á að auka sýnileika, vera lifandi vettvangur samtímalistar á Suðurnesjum og sterkt afl í íslensku myndlistarlífi.