Hafnarborg

Hafnarborg, menningar- og listamiðstöð Hafnarfjarðar, var stofnuð með gjafabréfi frá apótekarahjónunum Sverri Magnússyni og Ingibjörgu Sigurjónsdóttur árið 1983. Þá færðu þau hjón Hafnarfjarðarbæ listaverkasafn sitt að gjöf, ásamt húseign sinni við Strandgötu 34, þar sem safnið er til húsa. Í framhaldinu var hafist handa við byggingu viðbótarhúsnæðis sem hýst gæti sýningar og aðra menningarviðburði og lauk framkvæmdum við það árið 1988, þegar Hafnarborg var vígð. Safnið er þannig reist á grunni einkasafns sem hefur haldið áfram að vaxa í áranna rás og telur nú nærri 2.000 listaverk. Í stofngjöf hjónanna voru einkum verk eftir íslenska listamenn frá fyrri hluta 20. aldar en nú varðveitir Hafnarborg listaverkaeign Hafnarfjarðarbæjar, þar á meðal sérsöfn verka nokkurra listamanna. Stærsta sérsafnið er safn verka eftir listmálarann Eirík Smith (1925-2016) sem telur hátt í 400 listaverk. Safneignin vex ár frá ári og er safnað í samræmi við markmið samþykktrar söfnunarstefnu. Undanfarin ár hafa ný aðföng einkum endurspeglað sýningarstefnu safnsins og þá viðleitni að safna verkum sem varpa ljósi á strauma og stefnur samtímans um leið og leitast er við að styrkja safneignina sem heild. Á hverju ári eru settar upp fjölmargar sýningar og listviðburðir sem endurspegla grósku og gerjun samtímans, auk þess sem staðið er fyrir rannsóknum og sýningum á safneigninni. Sýningardagskrá safnsins er fjölbreytt og gerir skil ólíkum miðlum samtímamyndlistar auk þess sem reglulega eru sýnd verk erlendra listamanna og íslenskra listamanna frá fyrri hluta 20. aldar sem þykja hafa sérstakt gildi í tengslum við safneign Hafnarborgar. Rekið er öflugt fræðslustarf með leiðsögnum og fyrirlestrum sem tengjast sýningunum. Tónleikar eru einnig fastur liður í starfsemi safnsins og er flutningur klassískrar og samtímatónlistar, kammer- og djasstónlistar reglulega á dagskrá. Í Hafnarborg er sömuleiðis aðstaða til ráðstefnu- og fundahalds, auk alþjóðlegra gestavinnustofa fyrir listamenn.