Listasafnið á Akureyri

Listasafnið á Akureyri er yngsta listasafnið á landinu og er í eigu Akureyrarbæjar. Hugmyndin að stofnun þess kom upphaflega frá Jónasi Jónssyni frá Hriflu í blaðagrein sem hann skrifaði árið 1960. Þrír áratugir liðu uns hugmyndin um Listasafnið á Akureyri komst aftur í umræðuna og varð hún loks að veruleika á afmælisdegi bæjarins þann 29. ágúst 1993. Listasafnið á Akureyri er miðpunktur Listagilsins, til húsa þar sem áður var Mjólkursamlag KEA en byggingin er undir sterkum áhrifum frá Bauhaus-skólanum og hinni alþjóðlegu funkis-hreyfingu. Listasafnið sér um rekstur þeirra stofnana og starfsemi sem Akureyrarbær rekur í húsum sínum í Listagili við Kaupvangsstræti, en auk Listasafnsins er þar að finna Ketilhúsið sem nú er hluti af Listasafninu, gestavinnustofur Listasafnsins og vinnustofur listamanna og félaga í gilinu. Starfssvæði Listasafnsins er Akureyri og nágrenni og starfar það í þágu almennings. Viðfangsefni Listasafnsins er myndlist og hönnun og hlutverkið er að safna, varðveita, skrá og rannsaka m.a. listaverkasafn Akureyrarbæjar ásamt því að standa fyrir sýningum á sjónlistum af innlendum og erlendum uppruna. Safnið skal ennfremur miðla upplýsingum um safnkostinn og hafa til sýnis á áhugaverðan og aðgengilegan hátt fyrir almenning. Safnið heldur sérsýningar hvar sem safnmunir eru öruggir og lánar muni til sýninga með skilyrðum um öryggi þeirra. Safneign Listasafnsins skal skrá eftir viðurkenndum aðferðum auk þess að varðveita og forverja eftir bestu getu. Listasafnið á Akureyri starfar eftir mótaðri söfnunar- og sýningarstefnu sem skal miða að því að varpa ljósi á og efla þekkingu, skilning og áhuga almennings á sjónlistum. Safnið leitast við að höfða til og þjóna breiðum hópi safngesta og hafa starfsemi sína aðgengilega öllum. Listasafnið lýtur gildandi safnalögum, siðareglum ICOM og lögum um menningarminjar hvað varðar minjavörslu eftir því sem við á.