Tækniminjasafn Austurlands

Tækniminjasafn Austurlands var stofnað á Seyðisfirði árið 1984 með það hlutverk að safna, skrá og miðla minjum sem endurspegla tækniþróun, atvinnusögu og samfélagsbreytingar á Austurlandi, með sérstakri áherslu á Seyðisfjörð. Helstu söfnunarsvið safnsins tengjast ritsímanum, vélsmiðjum, rafvæðingu og húsasmíði, auk þess sem það hefur tekið við gripum sem tengjast sögu Seyðisfjarðar. Fyrsta sýning safnsins, um komu ritsímans til Seyðisfjarðar, var opnuð árið 1995 í Gömlu símstöðinni. Frá aldamótum 2000 jókst starfsemi safnsins, forstöðumaður var ráðinn og fleiri sýningar opnaðar. Stefna safnsins var að viðhalda verkþekkingu og leggja áherslu á notkun og endurgerð safngripa þar sem það átti við. Smiðjuhátíðin, sem haldin var árlega í júlí um árabil, naut mikilla vinsælda. Í desember 2020 urðu vatnaskil í starfsemi safnsins þegar stór aurskriða féll á safnið og eyðilagði hluta fasteigna þess og safnkosts. Í kjölfarið hófst umfangsmikið björgunarstarf við að grafa upp gripi, flokka þá og undirbúa skráningu þess sem eftir stóð. Einnig fór fram endurskoðun á stefnu og söfnunarstefnu safnsins. Sumarið 2022 opnaði sýningin Búðareyri – saga umbreytinga í því sem eftir stendur af gömlu Vélsmiðjunni. Sýningin fjallar um 150 ára sögu Búðareyrarinnar, þess hluta Seyðisfjarðar sem skriðan féll á, þar sem vagga atvinnustarfsemi í firðinum myndaðist á sínum tíma. Unnið er að uppbyggingu safnsins á nýjum og öruggum stað á Seyðisfirði, þar sem 19. aldar bryggjuhúsið Angró verður endurreist ásamt nýbyggingu. Markmiðið er að skapa lifandi og aðgengilegt safn með áhugaverðum sýningum, verkefnum og vinnusmiðjum í góðu samtali við heimamenn – en jafnframt að það verði fjölsóttur áfangastaður gesta Seyðisfjarðar. Opnun er fyrirhuguð árið 2028.