Sauðfjársetur á Ströndum

Sauðfjársetur á Ströndum er sjálfseignarstofnun og viðurkennt safn. Sauðfjársetrið var opnað 23. júní 2002 í félagsheimilinu Sævangi við Steingrímsfjörð á Ströndum. Fastasýning safnsins ber yfirskriftina: Sauðfé og sveitafólk á Ströndum, og á henni er fjallað um sauðfjárbúskap á Íslandi með sérstakri áherslu á Strandir, verkefni bænda og daglegt líf í sveit. Meðal umfjöllunarefna er sauðfjárrækt, sauðburður, fjármörk og merki, vorverk, heyskapur, jarðvinnsla, túnrækt, smalamennskur, réttir, sláturstíð, sauðfjársjúkdómar, nýting afurða af sauðfé, hrútar, fengitími, fjárhús, ullarvinnsla, hættur sem steðja að sauðkindinni og margt fleira. Munir sem tengjast sauðfjárbúskap eru þungamiðja sýningarinnar ásamt ljósmyndum af Ströndum og hálftíma löng heimildamynd er í gangi á safninu með viðtölum við bændur á svæðinu. Sauðfjárbúskapur fyrr og nú er settur í samhengi og leitast við að sýningin gefi heildarmynd. Textar eru á íslensku, ensku og þýsku. Reglulega eru settar upp tímabundnar sérsýningar og að öllu jöfnu eru 2-3 sérsýningar í gangi, í samvinnu við ýmsa aðila, ýmist sögusýningar, ljósmynda- eða listsýningar. Útisýning við Sauðfjársetrið er við stíginn Sjávarslóð sem liggur fram í Orrustutanga og eru söguskilti og listaverk við stíginn sem hægt er að skoða allan sólarhringinn og allt árið. Kaffistofa Sauðfjársetursins í Sævangi ber hið virðulega og viðeigandi nafn Kaffi Kind. Þar eru reglulega viðamikil kaffihlaðborð við margvísleg hátíðleg tækifæri, en annars er hægt að panta kaffi og súpu af matseðli alla daga. Safnið hentar vel til móttöku hópa. Minjagripabúð og barnahorn er á safninu og úti eru heimalningar á vappi yfir sumartímann. Viðamikið hliðar- og nýsköpunarverkefni á vegum Sauðfjársetursins er rekstur Náttúrubarnaskóla í Sævangi þar sem haldin eru margvísleg námskeið fyrir börn og fullorðna um náttúrutúlkun, minjar og menningararf, þar sem fræðslu og leik er fléttað saman.