Gljúfrasteinn - hús skáldsins

Gljúfrasteinn – hús skáldsins var heimili og vinnustaður Halldórs Laxness og fjölskyldu hans. Árið 2002 þegar 100 ár voru liðin frá fæðingu skáldsins festi íslenska ríkið kaup á Gljúfrasteini með því skilyrði að þar yrði safn um Halldór Laxness. Fjölskylda skáldsins gaf safninu allt innbú á Gljúfrasteini sem tilheyrði fjölskyldunni með sérstöku gjafabréfi. Safnkostur Gljúfrasteins er allt það innbú sem fjölskylda skáldsins færði ríkinu að gjöf. Það gerir safnið einstakt auk þess sem tilvist þess hvílir á rithöfundaverki Halldórs Laxness.  Munir, listaverk og ljósmyndir eru skráðar í Sarp en bókasafn skáldsins er skráð í Gegni. Þá eru handrit, dagbækur, sendibréf og þau skjöl sem fylgdu með í gjöfinni skráð og varðveitt á Handritadeild Landsbókasafns Íslands. Á Gljúfrasteini er leitast við að safna öllu því er viðkemur ævi og verkum Halldórs Laxness. Hlutverk safnsins er að sýna heimili skáldsins sem lifandi safn og standa vörð um lífsstarf hans. Áhersla er lögð á að safna, varðveita, rannsaka og miðla þekkingu um verk Halldórs Laxness og ævi hans og miðla þeim fróðleik meðal annars með sýningum, útgáfum og öðrum hætti. Gljúfrasteinn stendur fyrir margvíslegum viðburðum sem tengjast rithöfundaverki, ævi Halldórs og Auðar Sveindóttur konu hans.