Byggðasafn Reykjanesbæjar

Byggðasafn Reykjanesbæjar á rætur að rekja til ársins 1944 en það ár stóð Ungmennafélag Keflavíkur fyrir stofnun Byggðasafns Keflavíkur. Formleg stofnun safnsins í núverandi rekstrarformi var aftur á móti árið 1978 og hlaut það þá nafnið Byggðasafn Suðurnesja. Að því stóðu tvö sveitarfélög, Keflavik og Njarðvík. Árið 2002 var ákveðið að breyta nafni safnsins í Byggðasafn Reykjanesbæjar, enda skilgreinir það nafn betur starfssvæði safnsins. Byggðasafn Reykjanesbæjar hlaut viðurkenningu Safnaráðs árið 2014. Hlutverk safnsins er að stuðla að áhuga og skilningi á menningararfinum. Safnið er auðlind sem eykur lífsgæði og skapar virði fyrir samfélagið með því að vera áhugaverður áfangastaður fyrir innlenda og erlenda gesti, virkur námsvettvangur fyrir skóla og þátttakandi í rannsóknum og fræðastarfi. Áhersla er lögð á samstarf við aðrar stofnanir Reykjanesbæjar. Byggðasafn Reykjanesbæjar hefur sýningar í Duus safnahúsum, Duusgötu 2-8. Að auki hefur safnið umsjón með Stekkjarkoti og húsinu Innri-Njarðvík. Safnkosturinn samanstendur af munum, ljósmyndum og einkaskjölum. Hann endurspeglar sögu svæðisins, atvinnuhætti og menningu. Töluvert er til af munum er varða sjávarútveg, vinnu iðnaðarmanna, starfsemi Keflavíkurflugvallar og veru varnarliðsins á Miðnesheiði. Sérstaða og styrkleiki safnsins liggur að nokkru leyti í sögu 20. aldar. Byggðasafn Reykjanesbæjar varðveitir einnig fjölda bátslíkana smíðuðum af Grími Karlssyni. Skrifstofur safnsins eru að Flugvallarbraut 710.