Þingdalur

Varðveitt hjá

Þingdalur er vestan við frystihúsið Hólmaröst en er þó lítið annað er örnefnið eitt í dag. Þingdalur er í dag enginn „dalur“ því fyllt hefur verið upp í hann. Svæðið hallar þó lítilsháttar niður frá Hólmaröst að Gimli. Ekki er hægt að geta sér til um stærð dalsins. Gróðurinn er nær enginn, utan við að grasþökur hafa verið lagðar til fegurðar. Möl, steypa og malbik einkennir svæðið í dag (2005). Ástandið á dalnum er mjög slæmt, enda hefur þar mikið verið byggt í gegnum tíðina ásamt öðru jarðraski. „Á annexíunni Stokkseyri er einnig svipuð lægð [þ.e. svipuð og Goðadalur Ár- 096:504] rétt við bæinn nefnd Þingdalur“ segir í skýrslu Jakobs Árnasonar frá 1817. 3. 10. 1566: Uppkvaðning dóms um rán, högg og áverka Jóns Björnssonar fór fram á „vm haustid A Stockzeyre A Þijngstad riettum…“ (DI XIV:532). „Þingdalur er nefndur fyrst sem íbúðarhús árið 1907, og bjó Edvald Möller verzlunarmaður þar í fáein ár. Hús þetta var í rauninni skúr eða útbygging, áföst við Ólafshús, er síðar nefndist Helgahús, sjá þar. Þingdalur var annars gamalt örnefni, dregið af því, að þar var hinn forni þingstaður Stokkseyrarhrepps. Hans sér nú enga staði framar, því að dalurinn eða lægðin hefir öll verið fyllt upp smám saman og að fullu, er Alþýðuhúsið var byggt.“ (GJ 1952:393). Nú (2005) stendur Gimli, samkomuhús og þinghús hreppsins, sem byggt var 1921, þar sem Þingdalur stóð.

Aðrar upplýsingar

Heimildarmaður: Grétar Zophoníasson

Titill

Sérheiti: Þingdalur

Safnnúmer

Safnnúmer B: 165571-13

Staður

Staður: Stokkseyri, Sveitarfélagið Árborg

Aðfangategund

Fornleifar

Heimildir

Heimildaskrá Diplomatarium Islandicum. Íslenzkt fornbréfasafn. Fjórtánda bindi. 1944-1949. 1551-1567. Hið íslenzka bókmenntafélag, Reykjavík. Guðni Jónsson. 1952. Bólstaðir og búendur í Stokkseyrarhreppi. Stokkseyringafélagið, Reykjavík.

Upprunastaður

63°50'12.3"N 21°3'47.5"W