Panta mynd Notkunarskilmálar

Píanó

1855

Varðveitt hjá

Byggðasafn Árnesinga

Píanó af gerðinni Cadby frá árinu 1855. Standandi píanó, vel með farið en þarfnast stillingar. Í píanóinu er að finna raðnúmerið 8048. Fyrsta píanóið sem kom í Húsið á Eyrarbakka, óvíst hvenær. Vitað er að píanó var í Húsinu í æsku Hans B. Thorgrímsen faktorssonar sem fæddur var í Húsinu árið 1853. Árið 1889 eignuðust það hjónin Helga Friðrikka Vigfúsdóttir og Siggeir Torfason verslunarmaður og var í eigu þeirra og afkomenda til ársins 2020. Það þarf ekki að fara mörgum orðum um varðveislugildi þessa píanós. Húsið sem var miðstöð tónlistarmenningar á 19. öld eftir að þangað fluttu hjónin Sylvía og Guðmundur Thorgrímsen árið 1847 og unnu hér í þágu Lefolii kaupmanns í fjóra áratugi. Þar voru tónlist og söngur í hávegum höfð á þeirra tíma og tónlistarmenningin breiddist út um allt héraðið. Í stofu Hússins hefur verið spilað á píanó, og efnilegum héraðsbúum kennt. Þangað kom Bjarni Pálsson frá Syðra-Seli á 9. áratug þarsíðustu aldar, lærði á píanó af Sylvíu og einni dóttur hennar sem líka hét Sylvía. Bjarni kenndi svo bræðrum sínum og þeir héldu uppi öflugu tónlistarlífi í Stokkseyrarhreppi hinum forna og var sagt að hvergi á landinu væri tónlistarlíf eins öflugt og í lágsveitum Árnessýslu. Og þetta byrjar allt með Sylvíu Thorgrímsen og þessu merka hljóðfæri.