Panta mynd Notkunarskilmálar

Verðlaunaskjöldur, + hlutv.

1929 - 1931

Varðveitt hjá

Safnahús Borgarfjarðar

Verðlaunaskjöldur Kjartans Bergmanns Guðjónssonar. "Fyrstu verðlaun fyrir fegurðarglímu, 1929 - 31". Kjartan Bergmann byrjaði 7 ára gamall að æfa íslenska glímu við bróður sinn sem var þremur árum eldri. Eftir almenna sveitaskólakennslu fór hann að æfa frjálsar íþróttir og sund. Hann var í íþróttaskólanum í Haukadal hjá Sigurði Greipssyni 17 ára gamall. Síðan æfði hann glímu og fimleika hjá Jóni Þorsteinssyni íþróttakennara í Ármanni. Á ferli sínum sem glímumaður vann hann til flestra þeirra verðlauna sem íslenskur glímumaður getur unnið til, en aðalsmerki hans var að glíma fallega og drengilega glímu. Árið 1951 gerðist hann yfirskjalavörður Alþingis og starfaði hann þar til ársins 1982. Ásamt sínu aðalstarfi á Alþingi var íslenska glíman og ýmis störf innan íþróttahreyfingarinnar áfram hans hjartans mál. Árið 1993 réðst Kjartan í það þrekvirki að gefa út bókina stóru sem hann og samdi, Íslensk glíma og glímumenn. Sýsluglíma Mýrasýslu Fyrsta sýsluglíma Mýrasýslu var háð í Borgarnesi 24. febrúar 1929. Þátttakendur voru 8 víðsvegar að úr héraðinu. Keppt var um silfurbikar, sem Árni Helgason í Borgarnesi gaf til keppninnar, en hann var mikill áhugamaður um framgang íslensku glímunnar. Nokkrir áhugamenn í Borgarnesi gáfu silfurskjöld í verðlaun, sem veita átti þeim, sem fegursta og besta glímu sýndi og vildu á þann hátt stuðla að fagurri og drengilegri glímu. Báðir þessir verðlaunagripir áttu að vinnast til eignar þrisvar sinnum í röð. Úrslit þessarar fyrstu glímu urðu þau, að Kjartan Bergmann Guðjónsson frá Flóðatanga vann báða verðlaunagripina, þá aðeins 17 ára gamall, og lagði alla keppinauta sína. Næstur honum að vinningum varð Láus Salómonsson, síðar glímukappi Íslands, og þriðji í röðinni Ólafur Sigurðsson úr Borgarnesi, sem kenndur var við Klett, afburða hraustmenni.