Til baka í leit
Veistu meira?

Samfella

Varðveitt hjá
Byggðasafn Dalvíkurbyggðar Hvoll
Með samfellunni fylgir texti ritaður á bréfsefni Sigríðar Thorlacius, Bólstaðarhlíð 16, Reykjavík. 10. desember 1988. Samfella Solveigar Pétursdóttur Eggerz, prófastfrúar á Völlum. Samfella sú (pils og treyja), sem byggðasafninu er hér með afhent, var í eigu Solveigar Pétursdóttur Eggerz á Völlum í Svarfaðardal. Hún fól undirritaðri flíkurnar til umráða og ég síðan Elínu Eggerz-Stefánsson og er það samráð okkar, að byggðasafnið á Dalvík eignist þær til varðveislu. Um uppruna búningsins er nokkuð óljóst. Móðursystir mín Elínborg Hall (hálfsystir Solveigar), sagði mér eitt sinn, að hann myndi hafa verið saumaður á Eyrarbakka og að því er hún hélt, handa Jakobínu Melsteð fyrri konu Péturs Fr. Eggerz. Það verður þó að teljast ósennilegt af þeirri ástæðu, að til er annar búningur með sama handbragði og munstrum, jafnvel samskonar skófóðri í pilsi, sem sannarlega var saumaður handa Arndísi Pétursdóttur Eggerz, elstu dóttur Jakobínu. Hún giftist 21 árs gömul séra Páli Ólafssyni í Vatnsfirði árið 1879. Jakobína móðir hennar dó 1870, en þá eru aðeins liðin tíu ár frá því að Sigurður málari gerir tillögur og uppdrætti að hinum breytta kvenbúningi. Hins vegar kvæntist Pétur Eggerz aftur Sigríði Guðmundsdóttur árið 1873 (móður Solveigar) og er því miklu sennilegra að þessir tveir búningar hafi verið saumaðir um líkt eða sama leyti handa Arndísi og Sigríði, kannski af tilefni brúðkaups Arndísar. Fullvíst er að Sigríður notaði þennan búning þar til hún afhenti hann Solveigu, sem notaði hann framan af ævi við hátíðlegustu tækifæri. Sjálf minnist ég þess aðeins að hafa séð hana einu sinni í búningnum, en það var á skemmtisamkomu á Dalvík, er hún kom fram í gerfi Fjallkonunnar í skrautsýningu. Okkur er kært að búningurinn varðveitist í byggðasafninu á Dalvík til minningar um móður okkar og ömmu, sem í 40 ár átti heimili sitt að Völlum. Sigríður Thorlacius Elín Eggerz-Stefánsson

Aðrar upplýsingar

Safnnúmer
Safnnúmer A: 1422
Staður
Staður: Vellir, 621-Dalvík, Dalvíkurbyggð
Aðfangategund
Undirskrár
Undirskrá: Almenn munaskrá
Efnisorð / Heiti
Efnisorð: Samfella

Upprunastaður

65°55'11.1"N 18°32'35.3"W