Til baka í leit
Veistu meira?

Kistill, + hlutv.

1948
Varðveitt hjá
Safnahús Borgarfjarðar
Kistill, smíðaður af Þórði Jónssyni, Mófellsstöðum.  Stærð botnflatar 23,1 x11 cm, hæð 12,4 cm úr teak-viði og lokið er örlítið kúpt.  Lítill handraði er innan í kistlinum. Kistillinn var vinargjöf til Sigurðar Sigurðssonar, bónda á Ytri-Skeljabrekku, frá hjónunum Guðfinnu og Vilmundi á Mófellsstöðum, smíðaður af Þórði Jónssyni, bróður Vilmundar. Þórður var mikill hagleiksmaður og smíðaði margan kostagripinn þrátt fyrir að vera alveg blindur frá barnæsku.  Kistillinn var vinargjöf og þakklætisvottur til Sigurðar fyrir að hjálpa hjónunum á Mófellsstöðum að komast út á Akranes, því hann átti jeppa og var traustur bílstjóri, og þaðan var hægt að taka ferju til Reykjavíkur. Þetta var um vetur árið 1948 og Guðfinna og Vilmundur áttu son í Reykjavík sem hafði snögglega veikst af botnlangabólgu og lá fyrir dauðanum. Það var þeirra heitasta ósk að ná sambandi við hann áður en yfir lyki. Þetta tókst þeim með aðstoð Sigurðar. Sonur þeirra hét Sigurjón Vilmundarson, ungur og efnilegur maður. Hann var í námi í vélvirkjun í Reykjavík en lést þar 23. mars 1948 eftir einungis nokkurra daga legu, 22 ára gamall.  Þá var ekki mikið um að fólk ætti bíla og því síður ökutæki sem gátu farið um í slæmri færð. Kistillinn var gefinn til byggðasafnsins til minningar um þennan atburð. Gefandinn var Guðrún Salómonsdóttir (1902-1991) kona Sigurðar á Ytri-Skeljabrekku.  Hún útbjó gjafabréf ritað eigin hendi þar sem þessi fróðleikur kemur fram, skrifað 18. apríl 1990 á dvalarheimilinu Höfða á Akranesi. Skjalið er varðveitt á Héraðsskjalasafni Borgarfjarðar og hljóðar svo: Nokkur orð, sem eiga að fylgja kistu þessari. Hún var vinargjöf frá hjónunum Guðfinnu og Vilmundi, Mófellsstöðum, Skorradal, Borgarfjarðarsýslu. Hún er smíðuð af Þórði Jónssyni, þjóðhagasmið. Hann var fæddur 29. júní, 1874, og var bróðir Vilmundar á Mófellsstöðum. Kistan er vinargjöf og þakklætisvottur til Sigurðar Sigurðssonar, bónda míns á Ytri-Skeljabrekku, fyrir það að hann gat hjálpað þeim hjónum á Mófellsstöðum að komast út á Akranes, vegna þess að hann átti jeppabíl og var traustur bílstjóri, og þaðan var ferja til Reykjavíkur. Þau áttu son í Reykjavík, sem lá fyrir dauðanum og það var þeirra heitasta þrá að ná sambandi við hann áður en yfir lauk, og Sigurði bónda mínum tókst það með Guðs hjálp. Sonur þeirra hét Sigurjón Vilmundarson fæddur 19. júní, 1925, dáinn 23. mars, 1948. Blessuð sé minning þeirra allra. Nú gef ég Byggðasafni Borgarfjarðar kistuna í minningu um þennan atburð. Guðrún Salómonsdóttir frá Ytri-Skeljabrekku. Mín eigin rithönd. Skrifað 18. apríl, 1990,.   Höfða, Akranesi. Í kistlinum er lítil askja undan verðlaunapeningi fyrir 10 ára öruggan akstur. Við skoðun á hylkinu utan um verðlaunapeninginn 20. nóv. 2013 kom í ljós að peninginn vantar inn í, einungis er þarna að finna seðil með nafnnúmeri, líkast til Sigurðar. Hylkið er geymt í kistlinum. Í október 2019 tók Kvikmyndafjelag Borgarfjarðar viðtal við Guðrúnu Jónsdóttur forstöðumann Safnahúss þar sem saga kistilsins kemur fram og má sjá það hér: https://www.youtube.com/watch?v=4ZuhauQQAtc

Aðrar upplýsingar

Ártal
1948
Efni
Safnnúmer
Safnnúmer A: 2479-B
Stærð
23.1 x 11 x 12.4 cm Lengd: 23.1 Breidd: 11 Hæð: 12.4 cm
Staður
Núverandi sveitarfélag: Skorradalshreppur, Skorradalshreppur
Aðfangategund
Undirskrár
Undirskrá: Byggðasafn Borgarfjarðar
Efnisorð / Heiti