Magnús Gunnarsson
25.12.1855 - 12.3.1923
Staða
Verslunarmaður, Skósmiður
Staður
Staður: Laufásvegur 3, 101-Reykjavík, Reykjavíkurborg, Þingholt, Ísland
Núverandi sveitarfélag: Reykjavíkurborg
Sveitarfélag 1950: Reykjavík
Ítarupplýsingar
Vefbirting:
Magnús Gunnarsson, f. 25. desember 1855 í Sauðholti, Ásahr., Rang., d. 12. mars 1923, var skósmiður og kaupsýslumaður í Reykjavík frá 1877. Hann kvæntist (11. júní 1887) Þóru Ágústu Ólafsdóttur, f. 5. ágúst 1868 á Hliði í vesturbæ Reykjavíkur, d. 23. ágúst 1950, húsfreyju. Þau eignuðust fjögur börn: a) Guðlaugu, f. 22. desember 1887 í Reykjavík, d. 19. september 1971, b) Helgu, f. 27. maí 1889 í Reykjavík, d. 8. febrúar 1916, c) Guðrúnu Magnþóru, f. 13. júní 1891 í Reykjavík, d. 3. maí 1954, og d) Karl Gunnar Ágúst, f. 24. ágúst 1895 í Reykjavík, d. 29. október 1918.“Aðfaranótt hins 12. þ.m. andaðist, eftir langa og þunga legu, á heimili sínu, Laufásveg 3, einn af þeim borgurum bæjarins, er flestir sem hér hafa um lengra skeið dvalið þektu og öllum var að góðu einu kunnur, Magnús Gunnarsson skósmiður. Magnús sál. var fæddur á jólanótt 1855 að Sauðholti í Holtum; var hann í báðar ættir af ágætu bændafólki kominn. Faðir hans var Gunnar Tómasson, Jónssonar, Gíslasonar, er mann fram af manni bjuggu í Sauðholti, en móðir hans, Katrín, var dóttir Þorsteins í Núpakoti, Magnússonar, systir síra Tómásar á Brúarlandi, Guðlaugar konu síra Páls Matthiesen í Arnarbæli, Sigríðar konu síra Bergs prófasts í Vallanesi og þeirra systkina. Kringum 1875 kom Magnús hingað til Reykjavíkur, og hafði því dvalist hér hátt á 5. tug ára er hann andaðist rúmlega 67 ára gamall. Lærði hann skósmíði hjá Jakobsen gamla Færeying, sem margir af eldri borgurum hér kannast við, og stundaði síðan þá iðn um langt skeið. - Síðar hvarf hann frá því starfi að verslun um tíma í smáum stíl, og ýmsum öðrum störfum. Var hann þá stundum á sumrum fylgdarmaður ferðamanna um landið, bæði innlendra og erlendra, og var hann einkarvel til þess fallinn, ábyggilegur, kunni manna best með hesta að fara og til annars er að landferðalögum hér lýtur. 11. júní 1887 giftist Magnús eftirlifandi ekkju sinni, Þóru Ólafsdóttur frá Hliði hér í bæ. Var hjónaband þeirra hið ástúðlegasta, og heimili þeirra friðsamt reglu og snyrtiheimili. Af börnum þeirra hjóna eru þessi á lífi: Guðlaug, gift Bjarna Jónssyni alþm. frá Vogi, og Guðrún Magnþóra, gift Guðmundi Guðmundssyni verslunarmanni; en dáin eru: Helga (1916), og Karl Gunnar Ágúst (1918). Sjálfsagt verður Magnús ekki talinn meðal fyrirferðarmeiri borgara þessa bæjar, en sökum lundfestu sinnar, trúmensku og röggsemi í öllu er hann vann og annara mannkosta, skipaði hann með sóma sæti í annari fylkingu eigi ófríðari, fylkingu hinna friðsömu alvörumanna, sem ekki vilja vamm sitt vita, hvervetna koma fram til góðs, sem allir treysta og öllum er hlýtt til. Er hverju félagi því betur borgið, sem það á fleiri menn slíka. Við fráfall Magnúsar sál. er einum slíkum manni færra í þessum bæ, þar sem hann vann sitt dagsverk um hálfa öld, virtur og vel metinn af öllum, sem honum kyntust.”Ó. Vísir 19. mars 1923:2. Upplýsingar um tengilið: Elín Sigurðardóttir 2025, elinsigurdar@simnet.is.
Heimildir:
Aðfangabók Þjóðminjasafns Íslands. Nr. 21806 - 25504.
Tengd aðföng
