Glóðarker, til matargerðar

1800 - 1900

In preservation at

Glóðarker / fýrfat úr rauðum eir, sporöskjulaga með gagnskornu munstri í hliðum. Það hefur staðið á fjórum fótum en nú er einn fóturinn farinn af. Það er viðgert með koparplötum í botninn, bæði að neðanverðu og ofanverðu. Annað mjög áþekkt glóðarker er til í safninu, nr. Þjms. 5581. „Glóðarker, eða fýrföt, voru sums staðar til á bæjum, flest innflutt. Í þau var tekin glóð úr hlóðunum með eldtöng. Glóðarker voru notuð til að ylja upp í köldum herbergjum, halda kaffikönnunni volgri í baðstofu, eða öðrum smærri matarílátum og svo notuðu reykingamenn glóðarker til að halda lifandi í pípum sínum. Í sama skyni voru notaðir pottar þar sem menn bjuggu ekki svo vel að eiga glóðarker.“ Gefandi er Hans R. Berndsen. Hann kom með báða gripina nr. Þjms. 2008-55 á svonefndan greiningardag í Þjóðminjasafninu þann 9. nóvember 2008 og vildi afhenda þá safninu til varðveislu. Glóðarkerið er úr eigu afa hans, Fritz Hendrik Berndsen (f. 1837, d. 1927), kaupmanns á Skagaströnd, sem fluttist til Íslands frá Kaupmannahöfn í kringum 1855.