Go Back To Search
Do you know more?

Kveðja

1936
In preservation at
National Museum of Iceland
Tvíblöðungur með kveðju til Kristjáns tíunda og Alexandrínu drottningar, vegna komu þeirra til Íslands 1936. Kveðjan er frá Jóhannesi Kristjáni Jóhannessyni (f. 1885, d. 1953), trésmíðameistara og skáldi. Hún er prentuð af Víkingsprenti 1936. Á forsíðu stendur: Kveðja til Hans hátignar Kristjáns konungs tíunda og Hennar Hátignar Alexandrínu drottningar við komu þeirra til Íslands 18. júní 1936. Lotningarfyllst frá Jóh. Kristjáni Jóhannessyni trésmíðameistara og söngvara frá Sveinseyri í Tálknafirði. Á forsíðunni er einnig mynd af Jóhannesi og undir henni stendur: Mynd höfundarins, sem fæddist 14. júní 1885 og heitir í höfuðið á Kristjáni Danakonuugi IX. Önnur útgáfa aukin og endurbætt. Á opnunni eru ljóð Jóhannesar, tileinkuð Kristjáni konungi, við lögin Kong Christian stod ved højen Mast og Leiðast mér dagar. Á baksíðunni stendur "Fullveldisdagurinn 1. desember 1918". Þar undir er ljóð við lagið Frelsisbæn Pólverja.   Gefandi er Gunnar Gunnarsson (f. 1945). Tvíblöðungurinn er úr dánarbúi foreldra hans, Gunnars Einarssonar (f. 1915, d. 1983) og Jóhönnu Guðmundsdóttur (f. 1922, d. 2008). Óvíst er hvernig þau hjónin eignuðust kveðjuna en samkvæmt gefanda var faðir hans mikill safnari. Jóhannes Kr. Jóhannesson tók sér ýmislegt fyrir hendur. Á árunum 1937-1952 gaf hann út tímaritið Friðarboðinn og vinarkveðjur. Tímaritið fjallaði að mestu um hann sjálfan og í því birti hann meðal annars ljóð eftir sjálfan sig. Að auki voru þar birt innsend ljóð sem báru vitni um krafta hans og hæfileika, auk bréfa frá ýmis konar þekktum aðilum, svo sem Bandaríkjaforsetum og Adolf Hitler. Samkvæmt efni tímaritsins voru skáldkraftar hans svo miklir að hann gat kveðið niður drauga og komið í veg fyrir innrásir Þjóðverja. Jóhannes stofnaði Friðarfrelsisflokkinn og hugðist bjóða sig fram til forseta árin 1944 og 1952. Ekki komst hann þó á kjörseðil. Jóhannes hlaut dóm fyrir skjalafals árið 1919 og árið 1952 fór fram rannsókn á vegum dómsmálaráðuneytisins á tímariti hans, en einhver eintök þess þóttu of klúr og voru gerð upptæk. Þá fór einnig fram rannsókn á meðmælendalista hans vegna forsetakosninganna 1952, en ýmis fyrirmenni voru þar skráð sem meðmælendur, auk Jesú Krists sjálfs. Ólíklegt verður að teljast að kveðja Jóhannesar hafi ratað til Kristjáns konungs.

Main information

Dating
1936
Material
Object-related numbers
"Museumnumber b": 2022-88-3
Dimensions
19 x 13 cm Lengd: 19 Breidd: 13 cm
Place
Núverandi sveitarfélag: Reykjavíkurborg, Reykjavíkurborg
Record type
Collection
Undirskrá: Munasafn
Keywords
References
Skjöl Jóhannesar Kr. Jóhannessonar á Borgarskjalasafni. (2013, 27. febrúar). Skjalavefurinn. https://heradsskjalasafn.is/?p=524 Jóhannes Kristján Jóhannesson. (1937-1952). Friðarboðinn og vinarkveðjur. https://timarit.is/publication/1666