Handavinnupoki

1939

In preservation at

Handavinnupoki sem Guðríður saumaði 9 ára gömul í Miðbæjarskóla. Pokinn er allur handsaumaður. Hann er úr hvítu þéttofnu bómullarefni sem gæti verið hveitipokaefni. Að framan er mynd af stelpu í víðu pilsi sem minnir á fatnað frá Mið Evrópu. Munstrið fékk Guðríður sent frá ömmu sinni í Ameríku, en Jónína segir að amman hafi oft sent þeim munstur á transfer pappír (pappír með munstri sem hægt er að strauja á efni). Útsaumurinn er sérlega fallega unninn, mjög fíngerður og sporin jöfn. Á bakhlið pokans er fangamarkið GÞ saumað með útsaumi. Útlínur stafanna eru saumaðar með fíngerðum leggsaumi (kontorstingur, varpleggur), en inn í stafina er saumað ídregið krókspor í sömu spor og leggsaumurinn. Ídregið krókspor er einnig saumað til beggja hliða eftir endilöngum pokanum. Brotið er inn af faldinum á hliðum og hann saumaður niður í höndum. Pokinn er saumaður saman með því að varpa (sauma) brúnirnar saman með örfínum sporum. Að ofan er brotið inn af brúninni og hún saumuð niður í höndum. Snúin snúra er þrædd í pokann að ofan. Stærð á poka 30 x 25 sm. Söfnun, greining og skráning. Sigrún Guðmundsdóttir fyrrverandi lektor í textílmennt við Menntavísindasvið HÍ og Sigrún Laufey Baldvinsdóttir fyrrverandi textílkennari við Grunnskóla Seltjarnarness, Mýrarhúsaskóla.