Finnbogi Rútur Magnússon
23.2.1858 - 28.6.1890
Roles
Prestur
Place
Núverandi sveitarfélag: Norðurþing, Norðurþing
Sveitarfélag 1950: Húsavík
Staður: Brekka, 510-Hólmavík, Strandabyggð, Langidalur, Ísland
Sveitarfélag 1950: Nauteyrarhreppur
More information
Vefbirting:
Finnbogi Rútur Magnússon fæddist á Brekku í Nauteyrarhr., N-Ís. dó 1890 á Húsavík, S-Þing.
Maki (1883): Jónína Markúsdótti (f. 17.9.1862, d. 2.5.1902) Snæbjörnssonar kaupmanns á Geirseyri.
Barnlaus.
Nám: Stúdent frá Lærða skólanum 1880. Cand. theol. frá Prestaskólanum 1882.
Störf: Prestur á Kirkjubólsþing, Otraþingi í Arnarfirði og Húsavík 1886 þar sem hann þjónaði til æviloka.
Foreldrar: Magnús Jónsson, bóndi og hreppstjóri á Brekku og Neðribakka í Langadal og Ólína Kristín Þorsteinsdóttir, dóttir Þorsteins Þórðarsonar prests á Snæfjöllum og Rannveigar Sveinsdóttur. Meðal systkina Ólínu vorur Þorsteinn Þorsteinsson kaupmaður sem drukknaði frá Æðey (faðir Davíðs Schevings Thorsteinssonar héraðslæknis og Péturs J. Thorsteinssonar á Bíldudal). Einnig Þorsteinn Þorsteinsson kaupmaður á Ísafirði, sá hinn sami og náði til sín eignarhluta þeim sem Sumarliði Sumarliðason gullsmiður átti í Æðey. Magnús, faðir Finnboga Rúts, lést árið 1869, 77 ára að aldri. Ólína gifti sig aftur árið 1871, Guðmundi Jónssyni bónda frá Stóra-Laugardal í Tálknafirði. Hún var seinni kona hans. Þau eignuðus saman einn son, Magnús, sem lést 5 ára gamall. Guðmundur reyndist Finnboga sem besti faðir og menntaði hann vel. Árið 1874 fór Finnbogi Rútur í Latínuskólann, útskrifaðist þaðan 1880 og af prestaskólanum 1882. Vígðist sama ár prestur til Kirkjubólsþings við Djúp og var þar með kominn á æskuslóðir. Árð 1884 fékk hann Otradalssókn og voru þau hjón, Finnbogi og Jónína, þar með komin í nálægð við fjölskyldur sínar í Tálknafirði og Patreksfirði. Árið 1886 fékk Finnbogi Húsavík og fluttu þau hjón þá norður. Þar lést hann úr lungnabólgu árið 1890 og flutti Jónína þá vestur á Patreksfjörð til foreldra sinna. Árið 1898 flutti hún til Reykjavíkur þar sem hún rak fatahreinsun í Kirkjustræti, jafnframt seldi hún húsnæði, mat og kaffi á sama stað. Hún lést svo árið 1902.
Ólína Kristín Þorsteinsdóttir, móðir Finnboga Rúts, var merk kona og skörungur mikill. Voru margar stúlkur nefndar eftir henni og það sama gilti um Finnboga Rút, son hennar. Frá vinum hans og frændum eru allir þeir menn komnir sem bera þetta nafn. Sá fyrsti sem hlaut nafnið var Finnbogi Rútur Þorvaldsson (faðir Vigdísar Finnbogadóttur, fyrrum forseta Íslands), en faðir hans Þorvaldur Jakobsson var lengi prestur í Sauðlauksdal. Hann hafði verið samtíða Finnboga Rúti í skóla og voru þeir miklir vinir. Móðir Finnboga Rúts Valdimarssonar (og bróður hans, Hannibals Valdimarssonar) var Elín Hannibalsdóttir og móðir hennar var Guðrún Magnúsdóttir, hálfsystir Finnboga Rúts Magnússonar prests.
Hægt er að lesa um foreldra Finnboga Rúts Magnússonar í bókinni Vaskir menn eftir Guðmund G. Guðmundsson í grein sem heitir „Frá eymdum til auðs“.
(Upplýsingar fengnar í tölvupósti frá Guðfinnu Hreiðarsdóttur til Freyju Hlíðkvist Ómarsdóttur, 14.3.2013, í tengslum við skráningu á safngrip nr. Þjms. 2013-3. Færðar inn 19.6.2013 af Freyju Hlíðkvist Ómarsdóttur).
Reference:
Gunnlaugur Haraldsson, 2002. Guðfræðingatal 1847 - 2002, bls. 333. Reykjavík.
Related objects
