Go Back To Search

Helga Steinvör Baldvinsdóttir

3.12.1858 - 23.10.1941
Roles
Skáldkona
Place
Núverandi sveitarfélag: Húnaþing vestra, Húnaþing vestra Staður: Litla-Ásgeirsá, Húnaþing vestra, Víðidalur, Ísland Sveitarfélag 1950: Þorkelshólshreppur
Other name
Undína
More information
Vefbirting: Helga Steinvör Baldvinsdóttir, sem tók sér skáldanafnið Undína, er fædd 3. desember 1858 í Litlu-Ásgeirsá í Víðidal, Vestur-Húnavatnssýslu. Tæplega fimmtán ára að aldri fluttist hún með foreldrum sínum, Baldvini Helgasyni og Soffíu Jósafatsdóttur, til Vesturheims. Hún kvaddi nauðug ættjörðina og þar var hugur hennar til æviloka. Fjölskyldan settist að í Ontario og síðar Norður-Dakota. Helga giftist ung Jakobi Jónatanssyni Líndal. Hjónabandið var erfitt vegna drykkju hans og endaði með skilnaði. Fluttist Helga þá með börn sín til föður síns í Manitoba og bjó þar um skeið. Síðar giftist hún Skúla Árna Stefánssyni Freeman (f. 1867 - d.1904) og eignaðist með honum einn son. Bjuggu þau á Kyrrahafsströnd. Skúli lést af slysförum eftir fárra ára hjónaband og sonur Helgu af fyrra hjónabandi nokkrum árum síðar. Helga vann fyrir sér og börnum sínum með prjónaskap, fatasaumi og handavinnu, og varð þekkt fyrir listrænan útsaum.  Síðustu ár ævi sinnar bjó hún hjá dóttur sinni í Poulsbo, Washington-fylki, og þar lést hún 23. október 1941. Helga dvaldist mestan hluta ævi sinnar í sveit. Hún nam þrisvar land eða tók þátt í landnámi, og bjó stundum mjög afskekkt. Hún fór snemma að fást við ljóðagerð og hélt því áfram fram undir miðjan aldur, en þá hætti hún alveg að yrkja. Hún orti mest fyrir og í kringum aldamótin 1900 og vakti athygli bókmenntamanna vestra. Ljóð eftir hana birtust í vestur-íslensku blöðunum, fyrst Heimskringlu, en síðar Öldinni og kvennatímaritinu Freyju.Hún hafði mikinn hug á að gefa út ljóðabók en skorti fé til útgáfunnar. Vinur hennar, skáldið Jóhann Magnús Bjarnason, vélritaði síðar fyrir hana ljóðin, og lágu þau í handriti hans fram til ársins 1952, en voru þá gefin út undir nafninu Kvæði. Þá voru liðin rúm tíu ár frá láti skáldsins. Á efri árum varð hún þekkt fyrir púða sem hún gerði úr uppröktum kvensokkum (sjá t.d. Þjms. 2004-15).  Reference: http://servefir.ruv.is/vesturfarar/personur.html (23. mars 2007). https://www.skald.is/product-page/und%C3%ADna Helga Kress. 2001. „Undína 1858-1941“, bls. 136. Stúlka. Ljóð eftir íslenskar konur.  Bókmenntafræðistofnun Háskóla Íslands, Reykjavík. Undína (Helga Steinvör Baldvinsdóttir): Kvæði. Reykjavík 1952.  
Related objects