Límmiði, skráð e. hlutv.

1980

Varðveitt hjá

Tíu samskonar, samfastir límmiðar. Þeir eru rauðir, hvítir og svartir á lit með stílfærðri teikningu af gítar þar sem armurinn endar í hönd sem heldur um og kremur sprengiflaug. Þar fyrir ofan stendur: ROKK Gegn HER.. Límmiðarnir voru framleiddir árið 1980 fyrir tónleika sem haldnir voru til að berjast gegn veru hersins hér á landi. Karl Sighvatsson sá um að skipuleggja tónleikana. Um tónleikana (tekið af veraldarvefnum): [...] [S]tórtónleikarnir sem um er rætt voru haldnir á vegum samtaka herstöðvaandstæðinga þann 13. september 1980. Samkoman var haldin undir kjörorðinu Rokk gegn her. Í opnunartölu, sem Sveinn Hauksson hélt, var rokkið kynnt sem nýtt vopn í friðarbaráttu og fram komu hljómsveitir sem voru meðal þeirra vinsælustu á þessum tíma: Mezzoforte, Þursaflokkurinn og Utangarðsmenn. Tónleikarnir voru vel sóttir og blaðamaður Dagblaðsins skrifaði að vopnið nýja virtist ætla að vera sterkt í höndum herstöðvaandstæðinga. Reiknaðist Dagblaðinu til að um þrjú þúsund manns hefðu setið salinn og voru áhorfendur samkvæmt blaðamanni af öllum toga, „allt frá pönkurum upp í alþingismenn og allt þar á milli“. Milli tónlistaratriðanna tróð leikflokkurinn Táragas upp í gervi hermanna. Í stað þess að myrða fólk og limlesta var aðaliðja gervihermannanna að sippa, leika sér í teygjutvisti og öðrum leikjum sem venjulega eru frekar tengdir við friðsæla sumardaga og börn á grunnskólaaldri. Höllin var skreytt risastórum brúðum, illa förnum, sem áttu að tákna fórnarlömb stríðsátaka og einnig fjölda spjalda með slagorðum og myndum. Viðamesta skemmtiatriðið utan tónlistarinnar var þó sýning kvikmyndar af gasslagnum á Austurvelli árið 1949. Sumir tónlistarmannanna brugðu líka á leik, Karl heitinn Sighvatsson spilaði til dæmis í lögreglubúningi. Umfjöllun fjölmiðla um atburðinn var þrátt fyrir stærð hans mjög misjöfn, Dagblaðið og Þjóðviljinn birtu heilsíðuumfjöllun. Morgunblaðið þagði þunnu hljóði og Alþýðublaðið gagnrýndi Samtök Herstöðvaandstæðinga harðlega fyrir „ameríkanseríngu“ og hæddist að því að samtökin skyldu velja svo óþjóðlega leið, sem úrkynjað rokk, til að berjast gegn Kananum og uppnefndi samtökin „fótgöngulið Alþýðubandalagsins“. Gefandi er Vigdís Pálsdóttir, Tjarnargötu 38 í Reykjavík, en Inga Lára Baldvinsdóttir, dóttir Vigdísar, afhenti fyrir hönd móður sinnar.

Aðrar upplýsingar

Gefandi: Vigdís Pálsdóttir

Ártal

1980

Efni

Lífræn efni, Pappír

Safnnúmer

Safnnúmer B: 2008-62-6

Stærð

5.7 x 60 cm Lengd: 5.7 Breidd: 60 cm

Aðfangategund

Munir

Undirskrár

Undirskrá: Munasafn

Efnisorð / Heiti

Efnisorð: Límmiði, skráð e. hlutv.
Myndefni: Áróður, pólitískur

Heimildir

http://hugsandi.is/articles/alltaf-katt-i-hoellinni/ (höf. Unnur María Bergsveinsdóttir. Sótt 1. desember 2008, Freyja Hlíðkvist Ómarsdóttir).