Minjasafnið Kört

Safnið var stofnað 1997. Aðdragandi þess að safnið var stofnað var sá að stofnandinn Valgeir Benediktsson hafði frá unga aldri haldið til haga gömlum gripum úr héraðinu og þröngt var orðið um þá í hans eigin húsnæði. Frumkvöðull og sá sem byggði húsnæðið sem safnið er í er Valgeir Benediktsson. Hann hefur frá unga aldri staðið fyrir varðveislu menningarminja, bæði gripa, gamalla húsa, ljósmynda ofl. Rakel Valgeirsdóttir, þjóðfræðingur, hefur starfað við safnið frá upphafi og hafa þau Valgeir mótað starfsemi og ímynd safnsins. Reynt er að veita persónulega þjónustu og skapa hlýlegt andrúmsloft fyrir safngesti. Lögð er áhersla á snyrtimennsku jafnt inni sem utandyra. Núverandi eigandi og rekstraraðili er Valgeir Benediktsson. Einkum hefur verið safnað munum tengdum lífi og starfi fólks í héraðinu en einnig ljósmyndum. Gripirnir eru flestir úr Strandasýslu en nokkrir lengra að komnir. Megnið af gripunum er frá 19. og 20. öld en þó eru nokkrir miðalda gripir í safninu. Settar hafa verið upp nokkrar sérsýningar í safninu, bæði ljósmyndasýningar og þemasýningar tengdar einstaklingum sem skorið hafa sig úr fjöldanum á einhvern hátt í héraðinu. Safnið hefur einnig staðið fyrir öðrum menningarviðburðum. Sem dæmi má nefna að árið 2005 stóð safnið fyrir uppsetningu á minnisvarða um mennina þrjá sem brenndir voru haustið 1654 í Trékyllisvík sakaðir um galdra. Í aðfangabók safnsins hafa verið skráðir um 350 gripir og nálægt því 300 ljósmyndir. Allir gripir safnsins eru skráðir í hefðbundna safnaskrá en jafnframt eru aðföng safnsins skráð í Sarp en ekki í önnur kerfi. Um 90% af aðföngum safnsins hafa þegar verið skráð í Sarp.