Byggðasafn Dalamanna

Frumkvöðull að stofnun Byggðasafns Dalamanna var Magnús Gestsson (1909-2000) frá Ormsstöðum á Fellsströnd. Magnús hóf undirbúning að stofnun Byggðasafns Dalamanna 1968 og safnaði munum í samvinnu við Sýslunefnd Dalasýslu. Munirnir voru síðan geymdir í kjallara Dalabúðar til ársins 1975, að safnið fékk inni í kjallara undir kennsluálmu á Laugum í Sælingsdal. Magnús var safnvörður til ársins 1998. Í upphafi var safnið í eigu Sýslunefndar Dalasýslu, þá Héraðsnefndar Dalasýslu og nú sveitarfélagsins Dalabyggðar. Fyrsta sýning Byggðasafns Dalamanna var þjóðhátíðarárið 1974 í Dalabúð. Sumardaginn fyrsta 1977 var safnið fyrst opnað og síðan formlega vígt sumardaginn fyrsta 1979 af Kristjáni Eldjárn forseta Íslands. Nær allir munir safnsins eru tengdir Dölunum.  Áhersla er lögð daglegt líf gamla bændasamfélagsins, hlunnindanýtingu, handverk, hugvit, náttúru og annað það sem leggur grunninn að samfélaginu í dag. Auk menningarminja er ljósmyndasafn, steinasafn, fuglasafn og fleira sem tengist héraðinu.