Húsavík Museum

Menningarmiðstöð Þingeyinga er sjálfseignarstofnun í eigu fjögurra sveitarfélaga. Þau eru: Langanesbyggð, Norðurþing, Tjörneshreppur og Þingeyjarsveit. Saga safnsins: Upphafið að starfsemi Byggðasafns Suður-Þingeyinga var árið 1950 er gerð var samþykkt hjá Bændafélagi Þingeyinga um að hefja söfnun á munum og vinna að undirbúningi að stofnun sérstaks byggðasafns fyrir héraðið. Byggðasafnið var formlega opnað 9. júlí 1958 í gamla bænum á Grenjaðarstað í Aðaldal og er það skráður stofndagur safnsins. Jóhann Skaptason sem var sýslumaður Þingeyinga á árunum 1956-1974, var helsti áhugamaður um byggingu sérstaks húss, er rúmaði öll söfn sýslunnar og starfsemi þeirra. Hann tók fljótt frumkvæði varðandi allan undirbúning. Jóhann og kona hans Sigríður Víðis hugsuðu ætíð vel um safnið og ánöfnuðu því miklu af eigum sínum. Safnið hefur átt ýmsa aðra velgjörðarmenn. Safnahúsið á Húsavík var opnað formlega 1980 og var þar hluti byggðasafns. Sjóminjasýning var opnuð í nýrri viðbyggingu við Safnahúsið árið 2002. Breyting varð á fyrirkomulagi stofnunarinnar árið 2007 þegar Byggðasafn N-Þingeyinga varð hluti af því sem síðan hefur verið nefnt Menningarmiðstöð Þingeyinga. Í júní 2010 var svo opnuð önnur fastasýning í Safnahúsinu sem fjallar um sambúð manns og náttúru á svæðinu og kallast Mannlíf og náttúra – 100 ár í Þingeyjarsýslum. Menningarmiðstöð Þingeyinga er regnhlíf fyrir margs konar starfsemi og söfn. Í Safnahúsinu á Húsavík er miðja starfseminnar og þar eru auk fyrrgreindra fastasýninga; Sjóminjasýningar og Mannlífs og náttúru, tvö rými þar sem settar eru upp tímabundnar sýningar af ýmsu tagi. Í gamla torfbænum á Grenjaðarstað er bærinn sjálfur helsti sýningargripurinn en hátt í tvö þúsund gripir eru sýndir í bænum. Þar er einnig þjónustuhús með góðri aðstöðu fyrir gesti. Á Byggðasafni N-Þingeyinga á Snartarstöðum er safn sem opnað var 1980. Þar kennir margra grasa og er þetta um margt einstakt safn ýmissa muna úr héraðinu, merkilegt handavinnusafn, verkfæri og margt fleira.Menningarmiðstöð Þingeyinga tók við umsjón Sauðaneshúss árið 2015, en húsið er í eigu Þjóðminjasafnsins. Þar er sýningin „Að sækja björg í björg“ sem unnin var á árunum 2020-2021. Söfnun Í byrjun var aðaláherslan á að safna munum er tilheyrðu „gamla bændasamfélaginu“ - munum sem tilheyrðu hverfandi eða horfnum búsakapar- og heimilisháttum svo og híbýlum fyrri tíðar. Sýningin á Grenjaðarstað sýnir norðlenskt 19. aldar stórbýli með þeim húsmunum og tækjum sem eiga við í slíkum húsakynnum svo og munum sem beint eru tengdir sögu staðarins og fyrri ábúendum. Síðar var farið að huga meira að annarri söfnun í tengslum við sýningar. Safnað var miklu fyrir opnun sjóminjasýningar. Tilgangurinn er að fólk nú og síðar skilji betur hvernig forfeðurnir lifðu af því sem sjórinn gaf og hversu stóran þátt sjávarnytjar áttu í því að tryggja afkomu fólks fyrr og nú. 1966 var svo náttúruminjasafn formlega opnað. Síðar bættist við myndlistarsafn og ljósmyndasafn. Skráning Byggðasafn S-Þingeyinga: Um 5.500 munir skráðir í Sarp. 1500-2.000 aðföng óskráð. Önnur söfn eru skráð í Filemaker. Þau eru; náttúrugripasafnið, 1.258 munir; myndlistasafn, 1900 skráningar, um 40 óskráð; ljósmyndasafn, 180 þúsund myndir, um 1/3 óskráð, áætlanir um skráningu í áföngum í átaksverkefnum.  Byggðasafn N-Þingeyinga: Um 3.500 aðföng skráð í Sarp. Áætla má að um 200 aðföng séu óskráð. Allir skráðir munir eru komnir í Sarp.