Borgarnes Museum

Í Safnahúsi Borgarfjarðar kennir ýmissa grasa og áhersla starfsins er á fjölskylduvænt umhverfi, fræðslu og fjölbreytni. Miðlun á safnkosti fer fram með styttri sýningum og  föstu sýningunni Ævintýri fuglanna. Auk þessa er um þessar mundir unnið að uppsetningu á nýrri fastri sýningu. Safnahús Borgarfjarðar samanstendur af 5 safneiningum, byggðarsafni, listasafni, náttúrugripasafni, héraðskjalasafni og héraðsbókasafni. Hver eining starfa undir gildandi lögum um starfsemi þeirra, safnalögum, bókasafnslögum, lögum um opinber skjalasöfn og siðareglum ICOM. Auk þess byggir starfsemi Safnahússins á menningarstefnu Borgarbyggðar, þar sem m.a. er kveðið á um mikilvægi miðlunar og fræðslu. Safnahúsið og söfn þess eru í eigu sveitarfélagsins Borgarbyggðar og fer Byggðarráð Borgarbyggðar með stjórn Safnahúss og forstöðumaður menningarmála veitir stofnuninni forstöðu. Safnahúsið fékk nafnið sitt þegar undir sama þak flutti byggðarsafn héraðsins, héraðsbókasafnið og héraðsskjalasafnið árið 1970 og fljótlega bættist í hópinn Listasafn Borgarness og náttúrugripasafn. Árið 1960 er upphafsár Byggðasafnsins og var aðal hvatamaður þess Haukur Jörundsson, kennari á Hvanneyri. Aðstofnun þess stóðu á sínum tíma Samband borgfirskra kvenna, Búnaðarsamband Borgarfjarðar, Borgfirðingafélagið í Reykjavík, Ungmennasamband Borgarfjarðar og Kaupfélag Borgfirðinga. Safnið starfar samkvæmt eigin söfnunarstefnu og almennri stefnu sem endurskoðuð er á fjögurra ára fresti hið minnsta. Tilgangur safnsins er að safna, varðveita og miðla munum, myndum og sögu svæðisins frá árdögum þess til okkar daga, með áherslu á samfélagsgerð, atvinnu, menntun og hversdagslíf íbúa allt frá Skarðsheiði og að Haffjarðará.