Hyrna

1920 - 1980

In preservation at

Sjal, hyrna, úr handspunnu þrinnuðu þelbandi í mórauðum litbrigðum. Það var Helga Hannesdóttir á Skáney í Reykholtsdal (f. 1878, d. 1948) sem spann þelbandið en gefandi, Vigdís Pálsdóttir (f. 1924), systurdóttir Helgu, prjónaði hyrnuna. Í bréfi frá Vigdísi segir m.a.: „Á Skáney í Reykholtsdal bjó um langa hríð Helga Hannesdóttir, ættuð frá Deildartungu. Hún var afbragðs tóvinnukona, vandlát og velvirk en auk þess afkastamikil. Á garðyrkjubýlinu Víðigerði í Reykholtsdal bjuggu hjónin Petrea og Benedikt Guðlaugsson. Á merkisafmæli Petreu fékk hún að gjöf handspunnið þrinnað þelband í mórauðum litbrigðum frá Helgu á Skáney. Nú dróst að prjóna sjal úr bandinu. Helga féll frá og seinna Petrea frá hálfprjónuðu sjali. Þá var það dag einn að Benedikt kom í heimsókn til mín með bandið og spurði hvort ég vildi ekki prjóna úr því sjal [...]. Hér er hyrnan úr þessum samkembdu mórauðu litum ásamt sýnishorni af bandi.“ (sýnishornin eru nr. Þjms. 2011-14-3). Inga Lára Baldvinsdóttir, fagstjóri Ljósmyndasafns Íslands í Þjóðminjasafni, afhenti gripi nr. Þjms. 2011-14 fyrir hönd Vigdísar móður sinnar.