Karlmaður

01.01.1952 - 01.01.1953

In preservation at

Gamall maður á köflóttri skyrtu að vinnu við skilvindu. Þetta er Jakob Guðmundsson vinnumaður á Húsafelli í Borgarfirði (1873-1963). "Jakob, f. 1873, d. 1963, Guðmundsson. Hann var fæddur og uppalinn á Kolsstöðum í Hvítársíðu. Hann var vinnumaður á Húsafelli frá 1906 – 1963, farlama síðustu árin. Hér sést hann snúa skilvindu um 1952 – 1953, fætur bilaðir en handleggir að gagni. Hann var kallaður Kobbi, stálminnugur og bókhneigður. Á jólum 1929 las hann síðasta húslesturinn sem lesinn var á Húsafelli. Eftir það voru útvarpsmessur látnar duga. Hann safnaði bókum og sífellt að búa til vísur, brageyra óskeikult. Hann setti svip á heimilið ekki síður en Gunna [Guðrún Jónsdóttir vinnukona f. 1861]. Þau voru ólík að geðslagi. Hún lágvær og mild, hann hávaðasamur og hafði ekki alltaf góða stjórn á sér þegar illa lá á honum, einkum ef hann kom heim svangur, þó alla jafna glaðvær og skemmtilegur. Hann keypti útvarpstæki árið 1930, þriggja lampa Telefunken. Tvær rafhlöður þurfti að hafa við það, þurrbatterí sem entist árið og sýrurafgeymi sem þurfti að hlaða, líklega á 14 daga fresti. Rafmagn var komið á þremur bæjum í Hálsasveit og Hvítársíðu og þangað urðu menn að fara með sýrugeymana. Geymar frá Húsafelli voru hlaðnir í Kalmanstungu. Þurfti mikla aðgát þegar þeir voru fluttir á milli. Sýran eyðilagði föt og gat slasað hesta ef lak úr geymunum. Útvarpstækið var haft í innra herberginu uppi á lofti. Þurfti langt loftnet og öruggt jarðsamband ef það átti að verka." (Heimild: ÞÞ 2012-3-72).