Gosflaska

1975 - 1985

In preservation at

Gosflaska, tóm, utan af Sinalco sítrusaldingosdrykk. Flaskan er úr glæru gleri, tekur einn líter og er endurnotaflaska, þ.e. flöskum var skilað aftur, gegn vægu gjaldi, til framleiðandans og þær notaðar aftur. Á henni er áltappi og tveir límmiðar úr pappír, gulir, rauðir og hvítir, með vörumerki gosdrykkjarins. Sinalco er elsti gosdrykkur í Evrópu, var fyrst settur á markað í Þýskalandi árið 1902. Síðar var hann seldur í yfir 40 löndum, og er enn í framleiðslu. Nafnið Sinalco er stytting á latnesku orðunum „sine alcohole“ eða „án alkóhóls“. Sinalco kom á markaðinn á Íslandi árið 1954. Framleiðandi var H.F. Ölgerðin Egill Skallagrímsson í Reykjavík. Drykkurinn naut lengi vel mikilla vinsælda hér á landi. Framleiðslu Sinalco var hætt hér á Íslandi í kringum miðjan 9. áratug 20. aldar.* Lítersgosflöskur úr gleri komu á markað hér á landi á 8. áratug 20. aldar. Því er óhætt að segja að þessi flaska sé einhvern tíma frá tímabilinu 1975-1985. Flaskan er heil og í góðu ástandi. Gripirnir nr. Þjms. 2010-32 eru allir úr búi Jóhanns Hákonarsonar bifreiðastjóra (f. 1919, d. 1980) og Ragnhildar Sigurðardóttur húsmóður (f. 1921, d. 2008) sem bjuggu í Eskihlíð 13 í Reykjavík. Það var dóttir þeirra, Grímheiður Freyja Jóhannsdóttir, og bræður hennar sem afhentu gripina til safnsins, úr dánarbúi foreldra sinna. Freyja Hlíðkvist Ómarsdóttir og Lilja Árnadóttir, starfsmenn í munasafni Þjóðminjasafnsins, sóttu gripina á heimili þeirra Jóhanns og Ragnhildar í Eskihlíð 13. Einnig voru nokkrar ljósmyndir úr dánarbúi þeirra sem skráðar voru í Ljósmyndasafn Íslands. * Freyja Hlíðkvist Ómarsdóttir, jan. 2010: Í janúar árið 2012 hófs á ný innflutningur og sala á Sinalco á Íslandi. Af forsíðu Fréttablaðsins, 31. janúar 2012: „Gosdrykkurinn Sinalco fluttur inn, kominn í hillur verslana á nýjan leik: Gosdrykkurinn Sinalco vekur eflaust upp hlýjar minningar hjá mörgum Íslendingnum, en hann sést nú i verslunum á ný eftir um fimmtán ára hlé. Það er sælgætisgerðin Góa sem stendur fyrir innflutningnum og rötuðu fyrstu flöskurnar í verslanir 10-11 og fleiri búða rétt fyrir síðustu helgi. Helgi Vilhjálmsson, eigandi Góu og KFC á Íslandi, segir hugmyndina um að færa Íslendingum Sinalco á ný hafa verið að gerjast síðustu fimm ár. Svo hafi verið ákveðið að ráðast í innflutning af fullum krafti. Hann segist fullkomlega óhræddur við risana tvo á markaðnum, en það var Ölgerðin sem sá áður um innflutning hingað til lands. „Svo stendur til að ráðast í framleiðslu ef allt gengur vel,“ segir Helgi. Hann segist vilja að allir landsmenn geti notið drykkjarins og verður Sinalco því fáanlegt í langflestum verslunum landsins á næstunni. Sinalco var afar vinsælt hér á landi fyrir nokkrum áratugum og er flutt inn frá Þýskalandi. Sinalco er elsti evrópski gosdrykkurinn en hann var fyrst settur á markað árið 1902. Frá því var greint á vef Viðskiptablaðsins í gær að forsvarsmenn innflytjandans hafi unnið mikið og náið með verksmiðjunni og sammælst um að nota upprunalegu uppskriftina sem varð vinsæl hér á landi.“ „Ég man Sinalco.“ (Þórarinn Eldjárn, í „Ég man: 480 glefsur úr gamalli nútíð“, útg. 1994).