Mótmælaskilti
2009
In preservation at
National Museum of Iceland
Mótmælaskilti sem gefandi útbjó
sjálfur og bar við mótmælin í miðborg Reykjavíkur í kjölfar efnahagshrunsins
í landinu haustið 2008, hinni svokölluðu Búsáhaldabyltingu. Spjaldið sjálft
er búið til úr nokkrum bylgjupappaspjöldum og á framhliðina er límdur hvítur
pappír með prentaðri andlitsmynd af Davíð Oddssyni, þáverandi Seðlabankastjóra.
Til hliðar við myndina er tússuð áletrun með rauðum stöfum og tússaðir
svartir skuggar: BURT MEÐ BUBBA KÓNG. Fyrir neðan er svo tússað með svörtum
lit: PEREAT. Hér er að sjálfsögðu verið að vísa til Menntaskólans í Reykjavík
(áður Lærða skólans) og skólavistar Davíðs Oddssonar þar áður fyrr, sem
og hlutverks hans sem Bubba kóngs í samnefndu leikriti Herranætur í sama
skóla á námsárum hans þar. Spjöldin í skiltinu eru límd saman með hvítu
límbandi, sem og pappírinn á framhliðinni. Spjaldið er svo fest við tréskaft
með svörtu límbandi („teipi“). Spjaldið er því fremur viðkvæmt og spursmál
í hve langan tíma límið á límbandinu mun halda. Það er því hætt við að
spjald þetta muni fara fremur illa með tímanum. Efst á skaftinu er krókur
sem er frá því að spjaldið var hengt upp á sýninguna „Fyrir ári“ í Þjóðminjasafninu
sem stóð frá janúar til mars 2010, sem var sýning á gripum tengdum Búsáhaldabyltingunni.
Gefandi, Ingi Gunnar Jóhannsson,
var síðar mjög ósáttur við þegar Davíð Oddsson var ráðinn ritstjóri Morgunblaðsins.
Sagði hann áskrift sinni að blaðinu upp í kjölfarið og sendi bréf til Morgunblaðsins
með útskýringum sínum og ástæðum fyrir uppsögn áskriftarinnar. Bað hann
um að bréfið yrði birt í blaðinu. Við þeirri beiðni var ekki orðið en síðar
var bréf Inga Gunnars birt í DV. Útprentun af bréfinu og fréttinni af vefnum
www.dv.is
er að finna í möppu: Fylgiskjöl aðfangabókar.
Þann 23. mars 2010 barst eftirfarandi
tölvupóstur frá gefanda:
„Sæl Freyja,
skiltið með mynd af Davíð
Oddssyni og textanum "PEREAT - Burt með Bubba kóng"
útbjó ég á skrifstofu minni í Ármúlanum á einfalt pappaspjald, sennilega
var það í janúar 2009. Ég lét fyrst stækka dagblaðsmynd af karlinum
á ljósritunarstofu. Svo notaði ég svera spýtu af áramótaflugeldi
til þess að halda myndinni á lofti.
Skiltið fór ég með nokkrum
sinnum (2svar eða 3svar) á Austurvöll í aðdraganda búsáhaldabyltingar,
og eins fór ég með það í hópi fólks upp að Seðlabanka, þegar þar sauð uppúr
og dyrunum var læst (man ekki daginn, en hann er eflaust skráður).
Veit að skiltið sást þá vel a.m.k. á einhverri fréttamynd af þeim atburðum.
Stóð svo líka með skiltið norðan við Seðlabankann eitt eða tvö skipti í
kuldanum, þegar verið var að svæla þennan höfund Hrunsins og
megin skaðvald þjóðarinnar út úr húsum.
Áletrunin vísar í hið þekkta
PEREAT skólasveina gegn Sveinbirni Egilssyni rektor Lærða skólans,
en í þeirri menntastofnun hóf einmitt Davíð feril sinn sem leikari í hlutverki
Bubba kóngs; hlutverki sem hann upplifði svo sterkt að hann festist
í því um aldur og ævi og náði greinilega aldrei að komast út úr því.
Rvík, 23. mars 2010
Ingi Gunnar Jóhannsson“
Main information
Dating
2009
Material
Object-related numbers
"Museumnumber b": 2009-54
Dimensions
141 x 59 x 0 cm
Lengd: 141 Breidd: 59 Hæð: 0 cm
Record type
Collection
Undirskrá: Munasafn
Keywords
Keyword: Mótmælaskilti