Hökulbúningur

1300 - 1400

In preservation at

Hökulbúningur, útsaumaðir borðar, með hinu svo nefnda gotneska lagi, er ein álman á baki, 108 cm. l., og önnur á brjósti, 89 cm. l., og ein yfir hvora öxl á ská, fest við brjóst- og bak - álmur: verður því efri jaðarinn á þeim um 46, en hinn neðri um 87 - 92 cm. að l. Br. er um 16 cm. á hverri álmu. Þær eru allar með hinum forna silki - og gull - saumi í gotneskum stíl: er hverri álmu skipt í kafla og mannsmynd, standandi undir eins konar hvelfingum, á hverjum kafla: eru það alt postulamyndir, nema næstefsta myndin á bakálmunni, sem er af Maríu með Jesum á armi sjer. Fyrir ofan hana er Pjetur, en fyrir neðan Jóhannes og Jakob yngri. Á Axlaborðunum er ein mynd að aptan og önnur að framan: Andrjes og Páll að aptan, Jóhannes og Júdas Faddæns (?) að framan, en óskýrt er hverir þrír eru á brjóstálmunni, því að myndirnar eru orðnar stór skemdar og hefur verið saumað víða í þær með margvíslega litu ullarbandi. Mjóir silfurborðar hafa og verið festir á jaðrana, en þeir eru nær af aptur sumstaðar: er þetta hvorttveggja frá síðari öldum, en hökulbúningurinn útlendur listiðnaður, varla yngri en frá 14. öld. Hansen fekk þennan búning hjá síra Magnúsi í Sauðlauksdal í Patreksfirði í sumar, og er hann frá kirkjunni þar: var sprett af höklinum, sem var orðinn ónýtur af sliti.