Kyrtill
1930
In preservation at
National Museum of Iceland
Kyrtill úr hvítu silki, fóðraður
á ermum og yfir brjóst með þunnu siffon efni. Kyrtillinn er mjög sérstakur
að því leyti að gyllt munstur er ekki saumað í hann, eins og venja er,
heldur sprautað á, eins og tíðkast stundum með skreytingar á slifsum. Sjá
má að gyllta skrautinu er sprautað á efnið áður en kyrtillinn er saumaður.
Ekki er vitað um annan kyrtil með þess konar skrauti. Kyrtillinn er smelltur
að framan, frá hálsmáli og niður að mitti, með 6 smáum málmsmellum. Með
hálsmáli og framan á ermum er þunn blúnda. Gefandi er Sigurlaug Sæmundsdóttir
(f. 1938), en kyrtillinn var brúðarbúningur móður hennar, Jórunnar Sveinínu
Kristjánsdóttur (f. 6.1.1900, d. 13.4.1973). Að sögn gefanda saumaði móðir
hennar kyrtilinn sjálf, og sprautaði gyllingunni á, en Jórunn gekk í kvennaskólann
í Reykjavík frá 21 árs aldri og var mikil hannyrðakona. Eiginmaður Jórunnar
var Sæmundur Helgason (f. 24.9.1896, d. 8.7.1976), póstfulltrúi og
síðar deildarstjóri hjá Póst- og símamálastjóra í Reykjavík. Þau gengu
í hjónaband í desember 1930. Veislan var haldin á Hótel Borg og var það
fyrsta brúðkaupsveisla sem þar var haldin. Þau bjuggu fyrst á Skólavörðustíg
en síðar á Bókhlöðustíg 7 í Reykjavík. Með fylgdu tvær blæjur en önnur
þeirra, úr silkitjulli, var svo illa farin að henni var fargað. Hún var
mjög síð og í henni mátti sjá leifar af þurrkuðum blómum sem hafa verið
höfð til skrauts. Hin blæjan er nr. Þjms. 2007-27-2, og er af hefðbundinni
gerð. Gefandi á enn faldinn og koffrið sem fylgdu búningnum en sagðist
nota það hvoru tveggja sjálf. Einnig sagði hún að við kyrtilinn hefði móðir
sín verið í silkiskóm með sams konar gylltu, sprautuðu munstri og er á
kyrtlinum, en þeir eru nú glataðir.
Kyrtillinn og blæjan voru í hvítum
pappakassa er þau bárust safninu. Að sögn gefanda var búningurinn ávalt
geymdur í þessum kassa en hann var svo illa farinn að ákveðið var að farga
honum.
Main information
Dating
1930
Material
Object-related numbers
"Museumnumber b": 2007-27-1
Dimensions
120 x 0 cm
Lengd: 120 cm
Record type
Collection
Undirskrá: Munasafn
Keywords
Keyword: Kyrtill