Order a photo Terms of Use

Trafakefli

1681

In preservation at

National Museum of Iceland

Trafakefli útskorið úr bæki, l. 60,5 cm., br. 12 cm. Útskorið mjög laglega að ofan og á röndunum, og sömuleiðis handföngin bæði. Ofan í það er gjörð gróp og er rent gagnskornu loki, sem er áfast við aptara handfangið, yfir hana, svo að þar myndast líkt og prjónastokkur. Á botninn í þessu hylki er skorið SOLVØR VIGFUS DOTTER. Utan á röndina aptast er skorið annars vega ANNO og hins vegar DOM 1681. Sú sögn er um keflið, að það sje úr ætt þeirra Jómfrú Ingibjargar og frú Karítasar Illugadætra og fyrnefnd Sölvör (sic) hafði átt að vera móðir þeirra systra, en að faðir þeirra hafi verið prestur í Vatnsfirði getur ekki staðist (skrá P.P. ) Ingibjörg og Karítas (kona Jóns lektors ) voru dætur sjera Illuga Jónssonar á Kirkjubóli (d. 1782) og „Sigríðar“ , sem var dóttir sjera Magnúsar Teitssonar í „Vatnsfirði:“ það var því afi (móðurfaðir) þeirra, en ekki faðir sem var prestur í Vatnsfirði. Sölvör Vigfússdóttir mun vera kona Sæmundar próf. í Hítardal (d. 1687), Oddssonar, dóttir Vigfúsar sýslumanns Gíslasonar lögmanns í Bræðratungu: hún dó 1711. Víðast mun þó nafn hennar ritað Salvör 1) Óvíst er hversu þettað trafakefli hefur komist í ætt þeirra systra Ingibjargar og Karítasar. 1) Hannes skjalavörður Þorsteinsson álítur nafnið á trafakeflinu vera nafn þessarar konu. Freyja Hlíðkvist Ómarsdóttir Sesseljudóttir, 2025: Yfirkefli Ártal 1681. Frá Hítardal í Mýrasýslu. Áletranir með latínuletri á hliðum aftast á keflinu: ANNO DOM 1681 Áletrun með latínuletri á botni hólfs fyrir miðju kefli (hólfið var mögulega nýtt sem prjónastokkur): SOLVØR VIGFVS DOttER Þ.e.: Sólvör Vigfúsdóttir Anno domini 1681 Lengd 61,3; Breidd 12,1; Hæð 9,8 cm. Viðartegund: beyki (lítil skrautdoppa úr harðviði, mögulega eik). Sólvör Vigfúsdóttir (nafn hennar var einnig ritað: Salvör) var fædd árið 1636 og lést 28. nóvember 1711. Hún var dóttir Vigfúsar Gíslasonar sýslumanns og lögmanns í Bræðratungu. Hún var gift Sæmundi Oddssyni prófasti í Hítardal í Mýrasýslu (f. 1633, d. 9. maí 1687).