Order a photo Terms of Use

Krummi

1966

In preservation at

National Museum of Iceland

Leikbrúðan Krummi úr Stundinni okkar. Höfuð Krumma er úr appelsínugulu mjúku plasti. Fjaðrirnar eru málaðar í svörtum lit en goggurinn er ómálaður að mestu leyti. Augasteinninn er málaður á með svörtum lit og augnhvítan er gul. Á augasteininn og guluna er málaður hvítur blettur til að gefa glampa í augun. Málningin á Krumma hefur aðeins máðst af með tímanum. Hægt er að opna og loka gogginum með því að setja hendina inn í brúðuna. Það er tunga í gogginum úr rauðum textíl. Umhverfis hálsinn er kögur úr svörtum textíl líkur flaueli með glimmeri. Með brúðunni fylgja tveir „búkar" af Krumma. Annar þeirra er upprunalegi búkurinn, úr dökkbláum textíl með svörtu kögri meðfram hálsmáli. Kögrið hefur losnað að miklu leyti frá búknum. Á efnið er prentað munstur semlíkist fjöðrum. Upprunalegi búkurinn er orðinn snjáður og á honum eru tvö göt. Hæð hans er 26 cm. Nýrri búkurinn er úr sama flauelsefni með glimmeri og kögrið sem límt er við höfuð Krumma. Hann er í góðu ásigkomulagi og með kögur meðfram hálsmálinu. Nýji búkurinn er lengri, og hylur betur hendina sem stjórnar brúðunni. Hæð: 38 cm. „Rannveig og Krummi“ var sjónvarpsmyndflokkur sem sýndur var í barnaþættinum Stundinni okkar í Sjónvarpinu frá febrúar 1967 til 1969. Þar spjallaði Rannveig Jóhannsdóttir við Krumma sem Sigríður Hannesdóttir talaði fyrir og stýrði. Höfundur og leikstjóri þáttanna var Hinrik Bjarnason. Með brúðunni fylgir taska með ýmsum fatnaði á Krumma (mest prjónles) sem áhorfendur sendu honum í pósti. Taskan með fatnaðinum er skráð á númerið Þjms. 2022-75-2. Upplýsingar frá Hinriki Bjarnasyni (gefanda) 31.08.2022: Sjónvarpsmyndaflokkurinn „Rannveig og Krummi“ var leikbrúðuþáttur. Þar spjallaði Rannveig Jóhannsdóttir við leikbrúðuna Krumma, sem Sigríður Hannesdóttir talaði fyrir og stýrði. Þátturinn var hluti af barnaþætti Sjónvarpsins, Stundinni okkar, sem fyrst var sendur út á jóladag 1966, en síðan á hverjum sunnudegi og er nú, 2022, sá dagskrárliður sjónvarpsins sem lengst hefur haldið velli með upprunalegu nafni, að fréttum undanskildum. Fyrsti þáttur af „Rannveig og Krummi“ var sendur út 26. febrúar 1967. Þeir voru síðan á dagskrá sem hluti af Stundinni okkar, venjulega hálfsmánaðarlega, allt fram til 1969. Þættirnir urðu alls um 30 talsins, 15 – 20 mínútur hver. Í þáttunum spjölluðu þau saman, Rannveig og Krummi, ræddu um hvað eina sem börnum og hröfnum viðkom í dagsins önn og sungu viðeigandi söngva í hverjum þætti, oftar en ekki frumsamda texta höfundar við alkunn lög. „Rannveig og Krummi“ voru fyrstu íslensku leikbrúðuþættirnir í Ríkisútvarpinu-Sjónvarpi. Í raun voru þeir líka fyrsti innlendi, leikni framhaldsmyndaflokkurinn í íslensku sjónvarpi. Höfundur og leikstjóri þáttanna var Hinrik Bjarnason, fyrsti umsjónarmaður Stundarinnar okkar. Þáttunum var ætlað að vera uppbyggilegt skemmtiefni fyrir börn, reyndar fyrir hverja þá, er á horfðu og hlýddu, og voru gerðir með þeim hætti, að börn gætu brugðist við og haft samband við þau skötuhjúin, Rannveigu og Krumma, varðandi eitt og annað er fram kom þeirra á milli. Skemmst er frá því að segja að „Rannveig og Krummi“ urðu feikivinsæl, fljótlega skiptu póstsendingar til þeirra hundruðum í viku hverri og urðu flestar um 800 – 1000. Með bréfunum fylgdu ýmsar velmeintar leiðbeiningar og fyrirspurnir, teikningar og allskonar fatnaður á Krumma, einkum prjónles, og var öllum bréfum svarað með kortum til sendenda. Bréfin og teikningarnar hafa að mestu orðið fyrir barðinu á tímans tönn, en nokkuð er eftir af ýmiss konar flíkum, Krumma til skjóls og útlitsbóta. Það má fyrst og fremst þakka hirðusemi og áhuga Sigríðar Hannesdóttur. Um uppruna Krumma er það að segja, að hann er fremur frumstæð handbrúða, sem Hinrik Bjarnasyni áskotnaðist, líklega síðla hausts 1966, og sýndist geta fallið að hugmyndum hans um innlend efnisatriði í fyrirhuguðum þáttum fyrir börn í dagskrá hins upprennandi, íslenska sjónvarps. Hinrik fékk síðan til samstarfs tvær vinkonur sínar, Rannveigu, sem þrátt fyrir ungan aldur var margreynd listakona úr leik – og tónlistarlífi í skólum og unglingastarfi, og Sigríði, þekkta leikkonu úr leiklistarlífi þess tíma, ekki síst í revíum og skemmtidagskrám, auk starfa að brúðuleikhúsi með frumkvöðlinum Jóni Guðmundssyni og fleirum. Allir voru þættirnir „Rannveig og Krummi“ unnir eftir nákvæmum handritum og komu fullæfðir til upptöku í hvert sinn. Handrit þeirra flestra er nú að finna í Þjóðskjalasafni Íslands.