Alþingi, byggingin

17.06.1965

In preservation at

Hátíðahöld, 17. júní. Guðrún Ásmundsdóttir leikkona á svölum Alþingishússins og flutti ávarp Fjallkonunnar sem Þorsteinn Valdimarsson skáld hafði ort. Hátíðahöld á þjóðhátíðardaginn 17. júní 1965 voru mjög fjölsótt í Reykjavík, þrátt fyrir að veður væri ekki sem best, ofurlítil rigning annað slagið og sólarlaust. Hátíðarhöldin hófust eftir hádegi með skrúðgöngu frá Hlemmtorgi, af Skólavörðuholti og frá Melatorgi að Austurvelli þar sem formaður þjóðhátíðarnefndar, Ólafur Jónsson, setti hátíðina. Síðan hófst guðsþjónusta í dómkirkjunni og predikaði séra Emil Björnsson, en að henni lokinni lagði forseti Íslands blómsveig að styttu Jóns Sigurðssonar á Austurvelli. Síðan flutti Bjarni Benediktsson forsætisráðherra ræðu af svölum Alþingishússins og Guðrún Ásmundsdóttir leikkona flutti ávarp Fjallkonunnar sem Þorsteinn Valdimarsson skáld hafði ort. Þessu næst hófst fjölbreytt barnaskemmtun á Arnarhóli og var þar margt til skemmtunar. Síðdegis fór svo fram íþróttahátíð á Laugardalsvellinum. Um kvöldið var útisamkoma á Arnarhóli og flutti frú Auður Auðuns aðalræðuna, en óperusöngvararnir Guðmundur Guðjónsson og Rut Jacobson sungu. Einnig söng Karlakór Reykjavíkur og fluttur var leikþáttur. Að lokinni samkomunni á Arnarhóli var stiginn dans á Lækjartorgi, í Lækjargötu og á planinu við Hótel Ísland til klukkan eitt eftir miðnætti, en þá var hátíðinni slitið. Heimild: Þjóðviljinn 19. júní 1965.