Order a photo Terms of Use

Vasi, til skrauts

1971 - 1990

In preservation at

National Museum of Iceland

Vasi með hraunáferð. Renndur vasi með hraunmulning um sig miðjan. Vasinn er gulgrænn á litinn í kringum hraunmulninginn en að öðru leyti er hann brúnn. Á botni vasans er límmiði sem á stendur: Glit hf., Höfðabakka 9, Reykjavik Iceland, Handmade Lava Ceramics. Á miðanum er teikning af eldfjalli og númerið 11034. Vasinn er í góðu ásigkomulagi en aðeins hefur brotnað úr hraunmulningnum á nokkrum stöðum. Hæð: 34 cm, þvm. botns: 14 cm. Leirmunaverkstæðið Glit var starfandi frá 1957-1992. Glit var stofnað af Ragnari Kjartanssyni, Einari Elíassyni og Pétri Sæmundsen en auk þeirra voru stofnendur einnig Katrín Guðmunsdóttir, eiginkona Ragnars og Guðrún Sæmundsen, eiginkona Péturs. Starfsemin flutti úr bakhúsi við Óðinsgötu 13b árið 1971 í talsvert stærra húsnæði við Höfðabakkaog við það breyttist Glit í nútímalega og afkastamikla verksmiðju. Það er því hægt að fullyrða að vasinn er gerður eftir árið 1971 þ.e. eftir að Glit flutti. Eftir árið 1988 dróst starfsemin saman og var Glit lagt niður árið 1992. Árið 1962 sýndi Ragnar Kjartansson vasa úr keramiki úr öðrum efnum en venja var en hann hafði lengi verið að þróa þennan efnivið sem gerður var úr blágrýtishrauni sem bundið var með deiglumó frá Elliðaárbökkum. Vasarnir voru síðan mótaðir eins og höggmyndir. Samstarfsmenn hans fetuðu í fótspor hans með því að notfæra sér eiginleika hraunkeramiksins sem skapandi þátt í verkum sínum. Með tímanum þróaðist hraunkeramikið á þann hátt að það var orðið mjög frábrugðið upprunalegri hugmynd Ragnars. Þá var var farið að skreyta leirmuni á tilviljanakenndan hátt með hraunmulningi eins og sjá má á þessum vasa. Enn þann dag í dag er hraunkeramikið talið dæmigert fyrir íslenska leirlist. Vasann átti Emma Christence Benediktsson (fædd Reerslev árið 1928). Þjóðminjasafnið fékk til varðveislu fleiri íslenska leirgripi úr hennar eigu og eru þeir allir skráðir undir númerinu Þjms. 2024-69.