Drykkjarhorn
In preservation at
National Museum of Iceland
Útskorið drykkjarhorn, að líkindum frá 19. öld. Er líklega kýrhorn, fremur stórt. Það er ljóst á lit á breiðari hluta þess en mjórri endinn er dökkur. Mælt þvert yfir er það 39,5 cm langt, botninn er 8,8 x 7,5 cm í þvermál og stúturinn 2,3 cm í þvermál. Við stútinn er koparbeit. Í stútinn hefur verið festur svartur krani. Hann hefur brotnað af og verið límdur á aftur. Nú hefur hann brotnað aftur frá en fylgir laus með. Í stútnum er enn sá hluti kranans sem gekk inn í hornið og á honum límleifar. Hornið hefur því verið notað sem einhvers konar flaska eða peli. Botninn er úr tré, rauðbrúnn á lit, og með hvítum beinhnappi á. Botninn er festur með þremur koparnöglum sem virðast nýlegir. Einnig hefur verið sett lím með brúnum á nokkrum stöðum. Ólíklegt verður að teljast að botninn hafi nokkurn tíma verið vökvaheldur. Því má teljast sennilegt að hann sé síðari tíma viðbót og að áður hafi verið annars konar botn og jafnvel málmkantur eða -beit með brúnunum. Í hornið, í belti fyrir miðju þess, eru skornar vangamyndir karls og konu. Beggja vegna við það belti eru mjórri belti skorin jurtamynstri, laufum og blómum. Undir neðsta munsturbeltinu er rúnaletur:
ei skal saka meini blandin miödur
þ.e. Ei skal saka meini blandinn mjöður. Textinn vísar til þess að þann sem drekkur úr horninu skal eigi saka þótt mjöðurinn sé blandaður eitri. Þessa má til að mynda finna hliðstæðu í Sigrdrífumálum Eddukvæða (8. erindi):
Full skal signa
ok við fári sjá
ok verpa lauki í lög;
þá ek þat veit,
at þér verðr aldri
meinblandinn mjöðr.
Á milli vangamyndanna fyrir miðju horni eru einnig rúnir sem eru torræðari.
Mannamyndir eru fátíðar á útskornum hornum en jurtaskrautið á horninu er hefðbundið. Því svipar til útskurðar á brennivínshorni nr. Þjms. 11976 sem skorið er af Oddi Eyjólfssyni (f. 1815, d. 1895) sem bjó að Sámsstöðum í Fljótshlíð.
Í janúar 2011 var hornið á uppboði danska uppboðshússins Bruun Rasmussen, þá talið norskt og frá 18. öld. Það seldist ekki þá en í kjölfarið bárust upplýsingar um að hornið væri íslenskt og frá 19. öld. Það fór aftur á netuppboð hjá uppboðshúsinu og vinafélag Þjóðminjasafns Íslands, Minjar og saga, keypti hornið og færði safninu að gjöf.
Main information
Donor: Minjar og saga
Material
Object-related numbers
"Museumnumber b": 2011-52
Dimensions
39.5 x 8.8 cm
Lengd: 39.5 Breidd: 8.8 cm
Record type
Collection
Undirskrá: Munasafn
Keywords
Keyword: Drykkjarhorn