Taðspaði

1900 - 1930

In preservation at

Taðspaði úr furu, með sívölu þverhandfangi (þverkefli). Stærð 8,5 x 16,5 cm. Taðið var stungið út úr fjárhúsunum og flutt á þurrkvöll, þar sem það var klofið með spaðanum og þurrkað uppreist þannig að tvær flögur risu upp á rönd og hölluðu hver að annarri. Einnig var raðhreykt sem kallað var en þá féllu á víxl (að hluta) saman hverjar tvær svo úr varð röð. Þannig stóð það betur af sér storma. Þegar taðflögurnar voru þurrar voru þær teknar saman í taðhlaða. Undirstaðan var hæfilega stór hringur þá stóðu flögurnar hlið við hlið upp á kant svo var fyllt innan í þá gjarna með brotnum flögum, síðan lágu flögurnar raðaðar í hring hálft í hálft, svo þær bundu hvor aðra og holur voru á milli fyrir vindblástur. Þegar hlaðinn var tekinn að verða fullhár var hann látinn dragast að sér uns ein stór flaga lokaði toppnum. Hafður var vatnshalli á flögunum. Að hausti voru svo hlaðarnir bornir inn í skála eða eldhús í pokum og raðað þar í ferhyrnda hlaða. Ef hlaði var skilinn eftir var hann látinn halda lögun sinni og þakinn með torfi.