Order a photo Terms of Use

Fermingarkjóll

1940 - 1945

In preservation at

National Museum of Iceland

Síður fermingarkyrtill (fermingarkjóll), vélsaumaður úr hvítu satíni með tveimur mismunandi gerðum af blúndum sem handsaumaðar eru á kjólinn. Hálsmál er ferhyrnt og er kjóllinn opinn niður um 39 cm að framan en þar er hann festur saman alveg niður í pilsfald. Ermar kjólsins eru hálfsíðar og útvíðar með tveimur blúnduborðum, öðrum við faldinn og hinum 6 cm frá honum. Í kjólnum eru axlapúðar og rykkingar á öxlunum. Samskonar blúndu er að finna í hálsmáli og neðst á ermum. Hekluð blúnda með blómamunstri liggur samhliða þeirri í hálsmálinu, um 2 cm frá henni. Blúndan liggur svo niður kjólinn miðjan að framanverðu, þar til hún mætir samskonar blúndurenning á pilsinu. Hann nær allan hringinn og er um 16 cm fyrir ofan faldinn. Hugsanlega hefur kyrtillinn verið festur með nælu í hálsmálið og belti verið sett um hann miðjan. Kyrtillinn er úr eigu Guðlaugar Arngrímsdóttur (f. 1929, d. 2017) frá Litlu-Gröf, 551 Sauðárkróki. Guðlaug var fædd og uppalin í Litlu-Gröf, dóttir hjónanna Sigríðar Benediktsdóttur (f. 1886, d. 1948) og Arngríms Sigurðssonar (f. 1890, d. 1968). Sigríður var mikil handverkskona og saumaði hún kyrtilinn fyrir fermingu dóttur sinnar. Þá tíðkaðist að stúlkur klæddust síðum hvítum eða ljósum kjólum við fermingu. Sú hefð breyttist með tilkomu fermingarkyrtlanna, sem séra Jón M. Guðjónsson innleiddi árið 1954. Þeir voru eins og kyrtlarnir sem notaðir eru við fermingar enn í dag (sjá nánar um þá í bók Árna Björnssonar Merkisdögum á mannsævinni). Guðlaug hefur passað vel upp á kyrtilinn og var hún að velta fyrir sér að láta jarða sig í honum en hætti við það og vildi gjarnan að hann mundi sóma sér á góðum stað í framtiðinni. Sjá ennfremur: Þjms. 1972-68, 2005-8-1, 2012-40.