Pottlok
1983
In preservation at
National Museum of Iceland
Pottlok úr stáli sem notað var í búsáhaldabyltingunni, mótmælunum í miðborg Reykjavíkur í kjölfar efnahagshrunsins í október 2008. Potturinn, sem lokið passar á, fylgir, en það er þó pottlokið sem er ástæða þess að potturinn er tekinn inn í safnkost Þjóðminjasafnsins. Í búsáhaldabyltingunni var barið á pottlokið og sér þess vel merki, því lokið er bæði rispað og beyglað eftir barsmíðarnar. Pottlokið er um 17 cm í þvermál og tæplega 7 cm hátt, mælt með hnúði. Á pottinum eru tvö eyru úr bakelít. Hann er 10 cm hár (djúpur).
Gefandi, Margrét Ingibjörg Kjartansdóttir, segir svo frá sögu pottsins og pottloksins:
„Pottinn hafði maðurinn minn, Sigmundur Einarsson, fengið nýjan að gjöf frá systur sinni, Ingu Einarsdóttur, árið 1983 en hann var þá nýskilinn og orðinn einn í búi.
Nokkru áður en mótmælin hófust [síðla árs 2008] hafði verið hætt að nota pottinn því hnúðurinn eða haldið á pottlokinu hafði sprungið og eyðilagst. Sigmund vantaði eitthvað til að dangla í og varð lokið af pottinum fyrir valinu. Mótmælt var og barið í lokið bæði fyrir framan Alþingishúsið og Seðlabankann. Í fyrstu lamdi hann í lokið með trommukjuða sem hann fékk hjá vinnufélaga sínum, Kristjáni Jónassyni. Kjuðinn þoldi hins vegar ekki barsmíðarnar, fór í tætlur og endaði í ruslinu. Eftir það var barið í pottlokið með tilfallandi spýtukubbi.
Eftir að mótmælunum lauk datt mér í hug að taka pottinn aftur í notkun, nú í sumarhúsi okkar sem popppott (mér finnst popppottar verða svo ljótir og ég hafði engan annan pott sem gat gegnt því hlutverki betur). Til að notkunin yrði möguleg varð að finna nýjan hnúð á lokið. Fyrir valinu varð hvítur postulínshnúður sem geymdaur var úti í bílskúr. Hnúðurinn er reyndar halda af skáp eða skúffu á gamalli eldhúsinnréttingu, en ég hirti nokkra slíka hnúða þegar þáverandi samstarfskona mín, Jórunn María Hafsteinsdóttir, skipti um eldhúsinnréttingu heima hjá sér í Skipholti 48 í nóvember 1998. Gamla innréttingin var upprunaleg, frá 1958 eða 1959.
Á síðasta ári var tekið í gagnið spanhelluborð í sumarhúsinu okkar og varð potturinn þá ónothæfur, þar sem hann virkar ekki á slíkum hellum. Ég hafði það þá strax í huga að athuga hvort ennþá væri tekið við dóti sem notað var við mótmælin í búsáhaldabyltingunni, en kom því ekki í verk fyrr en nú. Hugsanlega ýtti það við mér að þess var minnst í fréttum í gær að fimm ár væru liðin frá frægri ræðu þáverandi forsætisráðherra Íslands, Geirs Haarde.“
Main information
Dating
1983
Material
Object-related numbers
"Museumnumber b": 2013-88
Record type
Collection
Undirskrá: Munasafn
Keywords