Hljómleikar
01.01.1966 - 01.01.1971
In preservation at
Akureyri Museum
Hannes með kontrabassann á Hótel KEA.
Hannes Arason var fjölhæfur tónlistarmaður eins og Lárus Zophaníasson greinir svo skemmtilega frá í miningarorðum um Hannes í Morgunblaðinu 3. febrúar árið 2000.
"Hannes Arason, okkar góði félagi, hefur nú lagt frá sér hljóðfærið í hinsta sinni, eftir að hafa leikið með Lúðrasveit Akureyrar um hálfrar aldar skeið.
Lengst af lék hann á bassatúbu en síðustu árin lék hann á tenórsaxófón í sveitinni. En hann var einnig mjög liðtækur á harmonikuna. Hannes eignaðist harmoniku ungur að aldri og þótt hann ætti næsta auðvelt með að ná lagi á hin ýmsu hljóðfæri var harmonikan það hljóðfæri sem hann sinnti best um ævina og hann var einn þeirra sem stofnaði Harmonikuhljómsveit Eyjafjarðar og lék með meðan ævin entist.
Hannes Vattnes Arason fæddist á Akureyri 30. maí 1927, hann ólst upp með móður sinni og bjó með henni allt þar til hann stofnaði eigið heimili, en af föður sínum hafði hann fremur lítið að segja í uppvextinum. Eftir lögbundna skólagöngu réðst Hannes til starfa í Skógerð J.S. Kvaran og vann þar um nokkurt skeið. Er mér minnisstætt er ég hitti Hannes, kunningja minn og skólabróður, á götu snemma sumars 1941. Sagði hann mér þá að hann hefði ætlað í gagnfræðaskólann að hausti en þá hefði sér boðist góð vinna í Skógerð Kvarans svo hann hefði hætt við að fara í skólann. Þótt eflaust hafi það verið hans val að taka fremur vinnuna en skólann hafa örugglega fleiri ástæður komið til.
Á þessum tíma var nám í framhaldskóla eftir barnapróf ekki sjálfsagður hlutur þótt námsgáfur skorti ekki og fyrir son einstæðrar verkakonu var sú leið langt frá því að vera auðveld og greið. Seinna starfaði Hannes um skeið við leikfangagerð, en réðst svo til starfa á húsgagnavinnustofunni Valbjörk og lærði þar húsgagnasmíði. Seinna keypti hann ásamt fleirum trésmiðjuna og amboðaverkstæðið Iðju og starfaði þar til æviloka. Hannes kvæntist þýskri konu, Kristínu Emmu Waltersdóttur, mikilli öðlingskonu, hinn 12. desember1966. Hafði hann þá reist sér einbýlishús að Suðurbyggð 21 sem var heimili þeirra æ síðan.
Eins og margir drengir gerðist Hannes skáti á yngri árum og tók þátt í félagsstarfi þeirra lengst af eftir því sem getan leyfði, síðast í St. Georgsgildinu og var jafnan aufúsugestur á fundum með harmonikuna sína.
Stundum fékk hann einhverja félaga sína úr lúðrasveitinni með sér til að spila við setningu skátamóta. Hann var flestum öðrum ólatari við að þenja sitt "magaorgel", eins og hann nefndi harmonikuna, ekki síst á skemmtunum lúðrasveitarinnar eða harmonikufélagsins, fyrir ánægjuna eina saman. Það má með sanni segja að tónlistin hafi verið hans förunautur í gegnum lífið. Hann lék í danshljómsveitum um margra ára skeið, ýmist á Hótel KEA, Hótel Norðurlandi eða Alþýðuhúsinu og einnig víða á dansstöðum í nágrannabyggðum, jafnvígur á saxófóninn, harmonikuna og kontrabassann.
Eins og getið var hér í upphafi gekk Hannes til liðs við Lúðrasveit Akureyrar síðla árs 1948 og kaus að leika á bassatúbu, ekki fyrir það að bassinn væri hans óskahljóðfæri, heldur hafði lúðrasveitin ekki á að skipa neinum föstum bassaleikara um þær mundir og má segja að Hannes hafi bjargað þar málum og hann lék á bassann í nærri 40 ár eða þar til hann skipti yfir á saxófóninn sem var það hljóðfæri sem hann hafði mesta löngun til að leika á í lúðrasveitinni."
Main information
Dating
01.01.1966 - 01.01.1971
Object-related numbers
Museumnumber a: KEA-3336
Place
Staður: Hótel KEA, Hafnarstræti 87-89, 600-Akureyri, Akureyrarbær
Record type
Classification
Keywords
Depiction: Hljómleikar
Depiction: Hljómlist, tónlist
Depiction: Tónlistarmaður
Depiction: Tónlist, hljóðfæri
Depiction: Hljómlist, tónlist
Depiction: Tónlistarmaður
Depiction: Tónlist, hljóðfæri
Place of origin
65°40'50.1"N 18°5'22.5"W