Húseyjarnælan

In preservation at

Brjóstnæla úr messing sem fannst er grafið var fyrir fjárhúsi skammt norður af bæ í Húsey (Norðurbæ), segir í aðfangabók. Þegar grafið var fyrir nýjum fjárhúsum við bæinn Húsey í Hróarstungu árið 1977 kom í ljós lítil næla, sem Elsa Árnadóttir húsfreyja tók til handagagns og kom til Minjasafnsins. Nælan reynist vera frá víkingaöld og er steypt í messing og skreytt með skíragulli. Skraut hennar er upphleypt og hefur gullið verið slegið í skorurnar. Þetta er næla í borróstíl, en stíllinn er talinn vera sá fyrsti sem barst til Íslands. Það sem einkennir stílinn er dýrshöfuð með útsæð, kringlótt augu. Á Húseyjarnælunni eru dýrshöfuðin fjögur og fléttast búkar dýranna hver um annan. Mjög svipuð næla hefur fundist í Færeyjum en á henni eru dýrshöfuðin þrjú og talið er að hún sé úr bronsi.