Sýningarskrá: Ljósmynd frá afhjúpun minnisvarða Bertels Thorvaldsens á Austurvelli 19. nóvember 1875. Myndastyttan, sem er sú fyrsta er sett var upp hérlendis og var gjöf Kaupmannahafnarborgar til Íslands á 1000 ára minningarhátíð Íslandsbyggðar, stóð lengi á Austurvelli en er nú í Hljómskálagarðinum.
L&pr. - 1348 b

Ljósmynd frá afhjúpun minnisvarða Bertels Thorvaldsens myndhöggvara, sem var íslenskur í föðurætt, á Austurvelli 19. nóvember 1875. Myndastyttan, sem er sú fyrsta er sett var upp hérlendis, var gjöf Kaupmannahafnar til Íslands á 1000 ára minningarhátíð Íslandsbyggðar og stóð lengi á Austurvelli en er nú í Hljómskálagarðinum í Reykjavík.
L&pr. - 1348 b

Bronsafsteypan af sjálfsmynd Thorvaldsens var fyrsta útilistaverkið sem reist var í Reykjavík og var afhjúpuð með mikilli viðhöfn á Austurvelli í Reykjavík á afmælisdegi listamannsins, 19. nóvember árið 1875. Var verkið gjöf borgarstjórnar Kaupmannahafnar til íslensku þjóðarinnar í tilefni þúsund ára byggðar hér á landi árið 1874. Réðu ættartengsl valinu á gjöfinni og þótti Íslendingum mikið til þess koma að eignast verk eftir þennan fræga listamann sem var af íslensku bergi brotinn. Verkið vann Thorvaldsen í Danmörku að áeggjan Stampe barónsfrúar, en að sögn var það honum þvert um geð að móta sjálfsmynd. Í verkinu sjáum við myndhöggvarann við vinnu sína með hamar og meitil í hönd. Virðist hann hafa tekið sér hvíld frá störfum og hallar sér upp að mynd sinni af Vonargyðjunni.

Árið 1931 varð sjálfsmynd Thorvaldsens að víkja af Austurvelli fyrir styttunni af Jóni Sigurðssyni, eftir Einar Jónson, og var hún þá flutt í Hljómskálagarðinn þar sem myndhöggvarinn horfir af sínum háa stalli út yfir Tjörnina.  Sjálfsmynd Thorvaldsens með Vonargyðjunni er einnig að finna í Central Park í New York og í íbúð myndhöggvarans Einars Jónssonar, á efstu hæð Listasafns Einars Jónssonar, má sjá þessa mynd sem rúmlega 30 cm háa gifsmynd.