4 myndir af skírnarfonti Thorvaldsens í Dómkirkjunni í Reykjavík.

Skírnarfonturinn í Dómkirkjunni í Reykjavík er líklega þekktasta verk Thorvaldsens á Íslandi. Skírnarfontinn gaf Bertel Thorvaldsen ættlandi sínu, Íslandi, árið 1827 eins og áletrun á bakhlið hans segir til um. Var fontinum komið fyrir í Dómkirkjunni árið 1839 og má telja hann merkasta grip kirkjunnar. Fonturinn er ferstrendur stöpull úr hvítum marmara með upphleyptum myndum á öllum hliðum og þéttum blómsveig um skírnarskálina. Á framhlið hans má sjá Jóhannes skíra Jesú í ánni Jórdan, á norðurhlið eru sömu persónur á barnsaldri með Maríu guðsmóður og á suðurhlið er Jesús að blessa börnin. Á bakhliðinni eru þrír englar ásamt áletrun. Sambærilega, en eldri, skírnarfonta úr marmara er einnig að finna í Hallarkirkjunni í Brahe-Trolleborg á Fjóni og Heilagsandakirkjunni á Strikinu í Kaupmannahöfn.