Skipið er stokkbyggt með lagi sem kennt er við smiðinn og nefnt Steinslag. Skipið er langt tréskip með tólf árum, og fjórum seglum. Skipið er tjargað svart. Skipið er tólfæringur eða tólfróinn teinæringur. Burðargetan er 10 tonn, eða þúsund fiskar. Áraskipið Farsæll var smíðaður fyrir Pál Grímsson þá búandi í Nesi í Selvogi, annálaðan formann í Þorlákshöfn. Farsæll var síðasta áraskipið sem gert var út í Þorlákshöfn. Það var á vertíðinni 1929 undir formennsku Kristins Vigfússonar trésmíðameistara. Eftir það var sett í það vél og það gert út í tvær vertíðar í Þorlákshöfn, undir formennsku Halldórs Magnússonar frá Hrauni í Ölfusi. Árin 1934-1935 var skipið notað á Eyrarbakka sem farþegaskip í einn og einn róður, undir formennsku Sigurðar A. Sveinssonar og Jóns Jakobssonar.
Árið 1939 var Farsæll keyptur til væntanlegs Sjóminjasafns Íslands. Gert var við skipið 1940, en síðan beið það örlaga sinna þar sem það stóð úti. Um það er best að vitna í Guðna Jónsson, sem segir svo í  Stokkseyrarsögu. "Það stóð í mörg ár úti á Eyrarbakka og horfði til að verða þar eyðileggingunni að bráð, enda þótt það ætti að heita í umsjá opinberra aðila. Fyrir framtakssemi Sigurðar Guðjónssonar skipstjóra á Litlu-Háeyri var skipinu loks bjargað frá að grotna alveg niður. Hann tók það í sína vörslu og reisti skýli yfir það." Sigurður  gekkst fyrir viðgerð á skipinu uppúr 1960 og annaðist Jóhannes Sigurjónsson frá Stéttum hana. Þjóðminjasafn Íslands er talinn eigandi skipsins, en Sigurður Guðjónsson byggði síðan yfir það sérstakt hús árið 1970 með vitund og vilja yfirvalda. Báturinn er sýndur í Sjóminjasafninu á Eyrarbakka, og er forsendan fyrir að safnhúsið var byggt.