"Skírnarhúfa, saumuð árið 1852 af Helgu Sveinsdóttur er bjó á Mýrum í Villingaholtshreppi og dó þar árið 1908. Hún átti átta börn og báru þau öll þessa húfu við skírnina." (Aðfangabók)

Fínleg og snjáð skírnarhúfa, fallegt handverk. Saumuð 1852 af Helgu Sveinsdóttur er bjó á Mýrum í Villingaholtshreppi. Helga var fædd 1828 og lést árið 1908 á Mýrum. Helga og eiginmaður hennar Þórður Eiríksson (1831-1908) eignuðust átta börn, elsta 1854 og yngsta 1871, sex systkinanna komust á legg. Börnin átta voru skírð með þessa húfu, þannig tengir húfan systkinin átta þó svo sum hafi aldrei hist. Hvort svona húfur voru algengar skal ósagt látið. Hitt er þó líklegt að efni húfunnar hafi komið inn á heimilið á Mýrum eftir eina af kaupstaðarferðum Þórðar til Eyrarbakka. Þar var um miðja 19. öld blómleg verslun og bændur frá öllu Suðurlandi, austan úr Skaftafellssýslu og ofan úr sveitum riðu í kaupstað með ull, fisk eða aðrar afurðir og tóku út vörur á móti, þ.á m. vefnaðarvöru/álnavöru.