Ford 3000

Dráttarvélin, árgerð 1975, er gjöf þeirra Guðfinnu og Þórarins á Steindórsstöðum í Reykholtsdal til safnsins 16. júlí 2011. Ford 3000 var framleidd á árunum 1965-1975 og var 38-40 hö. Dráttarvélin er ágætur fulltrúi þeirra breytinga sem þá voru að verða: Nútímalegt útlit og í stað öryggisgrindar komið ekilshús sem bætti vinnuaðstöðu og öryggi ekilsins til mikilla muna. Á Steindórsstöðum var vélin notuð allt til ársins 2011. 

Hér á eftir fer brot úr sögu dráttarvélarinnar:

„Árið 1975 hugðust þeir frændur Einar Pálsson á Steindórsstöðum og Sigurður Geirsson á Vilmundarstöðum festa kaup á heybindivél í félagi. Fór Einar til Reykjavíkur fyrripart vetrar til að festa sér vél. Fékk hann Þorstein bróður sinn, sem var búsettur í Reykjavík og rak þar bílaklæðningaverkstæði, til að lóðsa sig um borgina.

Þar sem þeir voru á gangi í Ármúlanum á leið í mat í Múlakaffi lá leið þeirra fram hjá Þór hf. Þar stóð úti í glugga þessi líka fína Ford 3000 dráttarvél. Einar staldraði við og sagði við Steina: „Þennan langar mig að kaupa, ég á bara ekki fyrir honum.“ Steini svaraði um hæl: „Ég lána þér bara.“  Fóru þeir síðan inn og sömdu um kaup á vélinni. Fékkst hún á sýningarverði með þeim skilyrðum að hún fengi að standa í glugganum fram á vor. Þegar kom að greiðslu dró Steini veskið úr rassvasanum og taldi traktorsverðið í seðlum á borðið.

Um vorið sótti síðan Einar hvort tveggja, Fordinn og bindivélina, og keyrði á Fordinum rakleitt heim að Steindórsstöðum.“

(Þórarinn Skúlason 16. júlí 2011).