Dragkista (kommóða) úr furu. Hún er 109,5 cm breið og um 49 cm þykk til hliðanna og um 96 cm há.

Skúffur eru fjórar, allar álíka djúpar, og framhliðar þeirra í sveigum, og komu því skúffurnar nokkru lengra fram í miðju en til hliðanna. Efst á hliðum og að framan er grannur, ávalur listi. Skráarlauf úr látúni eru á skúffunum, þau eru nokkuð grafin, breiðust ofan við miðju og líkast liljublöðum efst og neðst. Á hverri skúffu hafa verið tveir látúnshnúðar til að draga þær út með en eru allir týndir nú nema hvað stéttirnar eru eftir á neðstu skúffunni. Skrár vantar, nema hina efstu, og er hún lykillaus.

Dragkistan hefur verið blámáluð, en málningin er víðast af nú nema á hliðum og næstneðstu skúffunni. Listarnir milli skúffanna hafa þó verið málaðir bleikir síðan. Sums staðar er lítillega kvarnað úr dragkistunni, einkum af framhlið neðstu skúffunnar.

Góð hirzla og vel gerð í öndverðu, talin íslenzk smíð og gerð úr rekaviði.