Línskápur frá Tungu í Gönguskörðum. Hann er smíðaður úr afgangs panel. Hæð 133, lengd 73,7 og breidd 42,6 cm. Hjarir hafa verið færðar til, þær eru úr kopar, renniklinka er til að loka. Í skápnum eru 4 hillur. Hann er afar illa farinn vinstra megin að aftan. Skápurinn er orðinn mjög gamall. Þegar verið var að þilja baðstofuna á Núpsöxl, í Laxárdal fremri, gekk af panill sem varð efnivíður í þennan skáp. Helgi Magnússon flutti skápinn með sér er hann flutti frá Núpsöxl að Tungu. Skápurinn var þá settur á klakk á móti ullarpottinum. Brúnn gamli gekk undir. Skápurinn var alltaf notaður undir sængurföt, nærföt og annað þessháttar. Skápinn smíðaði Valdimar Kristjánsson, búhagur maður sem bjó þá á Kirkjuskarði í Laxárdal. Hann var frá Kollugerði sem er í túnjaðri Höskuldsstaða. Gef. Elísabet Andrésdóttir í Tungu í Gönguskörðum.